又有男藝人涉嫌嫖妓，今次呢位男主角就係現年40幾歲，曾經喺90年代香港樂壇成績唔錯嘅男歌手，後嚟佢去咗台灣發展仲好紅，不過近年事業發展唔係咁如意，鬱鬱不得志，仲一度傳佢經濟出現問題要大屋搬細屋㖭。
呢位男主角近日俾人發現喺北角一間酒店嫖妓，據知仲係搵咗一位內地姑娘，喺酒店房短敍咗大概一個鐘頭。
冇工開嫖妓密
呢單男藝人嫖妓事件日前仲喺一個網上嫖妓指南廣受討論，啲網友留言話佢近來冇工開，所以嫖妓都嫖得幾密吓，其中一個自稱「老豆」、相信係馬伕嘅人留言，話囡囡向佢展示咗同男藝人嘅合照，話同對方去咗半日街㖭！
呢個網站雖然將男藝人嘅名打咗個交叉，但基本上同公開姓名冇分別，又有口痕友留言話好羨慕男藝人曾經同過名模拍拖喎！睇嚟呢單嘢，男藝人嚟緊有排出嚟解畫。
有指呢件事嘅主角係杜德偉，就此事有記者噚晚去杜德偉位於天后嘅住所搵佢，但佢就笑住冇回應。