噚日，孫柏文喺《金手指》一欄講過政府一個表面上非常之矛盾嘅政策。呢個政策就係當天文台發出雷暴警告嘅時候，屬於康民署管轄嘅政府游泳池，泳池主管可以自行決定係咪繼續開放畀市民游水。不過，屬於食環署發牌機制下嘅私家泳池，就算該區天氣晴朗，都要硬性規定立刻關門。
當然，我哋特區有嘅係一個充斥住精英嘅政府，仲要係個「親（精英）疏（廢柴）有別」嘅政府。所以政府呢個表面上非常之矛盾嘅決定，一定有啲連我隻金手指都篤唔到出來嘅奧秘。因為我唔明白呢個政策嘅原因，所以前日我走去問過好多我覺得比我醒目嘅人，例如我個有100%《蘋果日報》DNA嘅同事絲絲，同《利字當頭》一欄總舵主利世民兄，聽吓佢哋嘅見解。我亦都呼籲過大家去到《金手指》流言區，畀你哋啲見解我諗吓。
咁噚日，我就講過同事絲絲嘅見解，佢話：「因為政府可能覺得，去得私家泳池游水嘅人，條命都值錢啲，而游政府泳池嘅就冇咁值錢，所以被雷劈都冇所謂。」雖然呢啲暗地裏鼓吹更多政府箝制市民自由嘅民粹見解，一定唔會獲得好似孫柏文啲自由市場支持者嘅贊同，不過我都要承認，呢個見解，真係一個簡單直接解釋到呢個矛盾出現嘅方法。
世民兄的兩個解釋
噚日，我都有應承過大家，會講利世民兄對於呢個矛盾政策嘅睇法。利世民兄其實有兩個見解，首先講第一個解釋方法。根據世民兄嘅分析，食環署一見天文台發出嘅雷暴警告，就需要私家泳池「拉閘放狗」，就等如食環署係喺天文台之下。而因康民署管理嘅政府游泳池，泳池主管可以決定繼唔繼續開放，變相係話當天文台嘅警告冇嘢，亦即等如天文台就喺康民署之下。
佢繼續解釋話，祖國共產黨一向以來對職級高低都非常之着重，原因就係一旦有外敵入侵，全民皆兵，都有清晰嘅指揮架構。我哋特區已經回歸，不過還充斥住很多港英餘孽，為了凸顯政府已經完全接受呢個共產黨運作模式，所以就用「表面上矛盾」嘅方式，高姿態將康民署、天文台、食環署分高低。到他朝如果外敵入侵我哋特區嘅時候，平日捕捉小販嘅食環署職員，就要聽康民署泳池主管嘅指揮喇！
第二個解釋方法，就係政府知道雷公係一個社會主義者。政府知道雷公行雷嘅時候，都係有眼劈，專劈私家泳池。因為雷公覺得只有政府泳池係「有公義」，私家泳池就「冇公義」，「冇公義」當然就要劈！想起政府「強政勵治」嘅管治手法，兩個解釋方法，都合邏輯。
最後，我想同大家分享吓，你哋喺《金手指》留言區，留下來嘅兩個睇法。第一，就係fan屎Eric嘅睇法，佢話：「政府游泳池主管不想影響入場費收入，所以決定繼續開放。」唔錯嘅睇法，因為如果政府所有部門都有呢個思維，佢哋就唔需要銷售稅。第二個睇法，亦係我覺得最明智嘅睇法，就係fan屎LiLi嘅留言，佢話：「不要講廢話。」孫柏文唯一嘅回應就係：「收到啦！」
孫柏文