關你車事：車架只21磅Track王個仔路霸

ApriliaRS125係Track王125GP個仔，身懷賽車元素，特別是那個只重21磅的車架，女仔揸都好似落場賽車咁過癮，速度同裝備又拍得住落場賽車。RS125擁有賽車裝備又適合新牌仔或女仔嘅街車，想知佢有幾多絕技?咁就要睇清楚。
記者：黃婉冰　攝影：譚盈傑
Model：Irene

身懷125GP賽車基因

簡單啲咁講，ApriliaRS125嘅真正身份，其實係一部身懷賽車基因嘅入門級街車，因為佢內內外外都有晒賽車嘅裝備。首先，廠方特別採用125GP賽車技術嚟開發，雖然新車引擎同上一代無分別，但新車配備了全新設計的低風阻「啡呤」、簡約車身線條、倒立式前叉、4活塞式制動卡鉗等各種後天優點，所以雖然新舊兩代都是採用同一引擎，但對比起來，新RS125在路面的速度表現還是比舊款優勝。

■新車依舊沿用低風阻設計，加上輕量級體重，話飛就飛。

9.75kg車架30匹馬力新手都識揸

咪睇RS125成身「啡呤」紋晒身就以為佢好惡好難操控，查實新牌仔都可以舞得佢掂，因為新車車架用上超輕的鋁合金打造，所以車架只重9.75kg（約21磅），要做到攻彎平穩而靈活、收放自如絕對不難，雖然車身屬輕量級，但駕駛起來依然可以給人一種紮實的安全感，對新牌仔甚至女仔嚟講，要揸得掂佢，都唔係無可能。雖然全新RS125引擎只屬於2衝程設計，但馬力就高達30匹，輕量級車身加上重量級爆炸力，起步可能未能滿足到你，但引擎轉數去到6,000轉時，那股衝着去的速度感會即時出現，給你一種輕快而平穩的駕駛樂趣。

「老虎樣」新造型個樣夠嚇

雖然話新一代RS125經過收身後比上一代纖巧，但望真啲，其實新一代仍不失街車應有的硬朗外形，新車線條依然遺傳了RSV家族的特徵，特別是頭燈，左右兩幅式孖燈設計，賣相比上一代更有型格，光亮度亦比前者優勝。除此之外，車尾同樣採用修長而明確的線條設計，好明顯，新車擺明大玩硬朗線條感，「啡呤」上大大個惡「老虎樣」，硬橋硬馬點都比流線圓渾外形煞食，揸出街個樣睇得又嚇得，但女仔揸要打醒十二分精神，型過頭，好易俾人撩鍊車㗎！