賣花女教嚐花

賣花女教嚐花

花開花落,隱隱然勾起人憂傷之情;點解靚嘢通常都係曇花一現?花店老闆娘Tiffanny:「喺花最燦爛時欣賞、可飽眼福;喺花落前摘花煮餸、可飽口福!開心傷心只是觀點與角度!」惜花人作「嚐」花人,落紅不是無情物,化作美饌更動人!
記者︰劉昱蘭 攝影︰陳盛臣
示範︰中環讀者Tiffanny
鳴謝︰TIFFANNYFLOWERS
(25263606)

薄荷花蝦仁 彈牙留香

價錢︰$30/4人
需時︰20分鐘
材料:蝦仁11/2磅、薄荷花4支、雙蒸酒1茶匙、胡椒粉少許、蜜糖3茶匙、橄欖油適量
芡汁︰水2碗、喼汁/豉油/豆粉各2茶匙、麻油1茶匙、糖少許

1.炒蝦仁

蝦仁先解凍,然後以油起鑊,炒蝦仁約5分鐘,加胡椒粉及酒除雪味。

2.煮花芡

花枝加水煮8分鐘,隔渣後加入芡汁料再煮5分鐘至起泡,再放入拌勻少許糖的花略兜。

3.掃蜜糖

蝦仁加入芡汁後,掃上一層蜜糖,用焗爐焗1分鐘即可。 

薄荷花入饌秘技

以花煮菜已經夠怪!花莖硬邦邦都可以用嚟煮?Tiffanny解釋:「成朵花入口,軟綿綿入口即化,再加清香四溢齒頰留香嘅感覺,真係無任何食材可媲美;煮花莖!係要將薄荷花的香味逼晒出嚟,其實莖位的薄荷味遠比花的部份濃烈,想個芡汁花味突出啲,畀心機煮花莖啦!」

炸麝香
香甜鬆化

價錢︰$20/3人
需時︰10分鐘
材料:日本麝香花2支、粟粉1/3碗、葡萄糖粉及油適量

■脆卜卜的花還是第一次食到,沾了葡萄糖粉又甜又鬆化,邊食邊有陣麝香味滲出,夠獨特。

1.上粉

麝香花洗淨瀝亁,然後均勻地沾上粟粉。

2.落油鑊

將一鍋油加熱後,加入麝香花,炸至脹卜卜,即可放上鋪好葡萄糖粉的碟上。

貼士

麝香花極易燶,最好在油滾後,校細火先將花落鑊。

玫瑰肉片
肉鮮淡香

價錢︰$22/4人
需時︰10分鐘
材料:瘦肉1斤、食用玫瑰花亁15粒、玫瑰6朵、橄欖油適量
調味︰雞粉1茶匙、老抽/豉油各1湯匙、生粉2茶匙、糖1茶匙、胡椒粉少許、水6湯匙

■相對薄荷花,玫瑰就淡味好多,肉的鮮味有淡淡花的清香,絕不喧賓奪主。

1.洗花

花洗淨(未全開的最好切開一半洗),玫瑰花亁浸水。

2.調味拌肉

將調味料與瘦肉拌勻,然後落油起鑊炒熟,備用。

3.煮花

花亁及鮮玫瑰落鑊加水,煮至腍身加入瘦肉略兜即可。

煮花菜似插花
TiffannyProfile

以花入饌,未嚐一口,香味已經相當誘人!睇見Tiffanny當正碟餸係「花泥」一樣,左插一枝花、右擺一塊葉,做到酒店式Setting;住家菜好多時大家只顧味道,色相、香味本來就係做菜基本功嘛!
幾代經營花店的Tiffanny細訴兒時趣事,「細路仔時乜都擺落口,長大後開花店好自然就擺花入口!」到今日自己成為花店主事者,成間舖咁多花任佢舞,完全可以肆意選花入饌!

必選橄欖油

「食花同襯花束都係一樣咁好玩,淡味如玫瑰、茉莉,最正係新鮮原味放入口嗒!茴香等濃味花,香料味重如八角,適合與魚包錫紙放焗爐煮;熟後打開錫紙,全屋茴香香氣,未食心情都已經靚晒!」另外Tiffanny仲提醒大家,煮花食最重要係選油,芥花籽油、花生油味太重,只有橄欖油先可以煮出花的清純香味!