自《火舞黃沙》後，黃德斌的赤膊形象深入民心，今個夏天更頻頻除衫搵外快，昨日夥拍陳苑淇在酒店泳池，迎戰八名肌肉男以及三點式美少女，兩位對自己的身形均相當滿意，更不怕貨比貨。
陳苑淇、黃德斌為悠美村修身太陽油做代言人，昨日二人在沙田麗豪酒店泳池為「腹肌型男長腿美女夏日巡禮」擔任嘉賓評判，四男四女參賽者穿上泳褲、三點式泳衣玩遊戲。
教性感搽油
陳苑淇率先教大家如何性感地搽太陽油，然後示範如何展示完美體態，二人又在沙灘椅上，擺出各種誘人的甫士，之後黃德斌還到泳池中玩遊戲，認真落力。
四位赤裸上身的男參賽者，身體相當健碩，嘉賓黃德斌亦不禁上下打量，他說：「知道要出席呢個活動，之前都要操一操，做多兩set。」
最近黃德斌頻頻除衫，為不同的產品做宣傳，有人覺得他要經常賣肉很慘，他笑說：「夏天有好多唔同product，除衫係多少少，其實我冬天着羽絨都好型，唔一定唔着衫，係你哋講到我咁，唔除唔得，豈有此理。」
死撐多人睇
陳苑淇未敢穿三點式示人，最後被現場的四位三點式參賽者搶盡鏡頭，她否認說：「唔係呀！我出來你哋都係影我。」陳苑淇不抗拒着三點式拍廣告，她說：「我唔介意，我14歲已經着三點式，係無睇頭，以前仲好瘦，係近年開始長大，唔係一支竹，𠵱家對自己身形好滿意。」
採訪、攝影：楊潔雯
