畀你揸庄，5,000呎舖位你會點玩？有人就豪使200萬裝修，一室營造出60、70同80年代3個唔同懷舊區。嚟呢度Hea，你可以當自己係60年代嘅陳寶珠、70年代嘅飛仔飛女，80年代嘅哥哥或者梅艷芳。我就簡單啲，點都要食箸意粉坐一坐全場最貴嗰張BallChair……
記者：黃若茵 攝影：伍慶泉
模特兒：Yu（PureModels）
化妝及髮型：Meegan&Kinki（MaeVon）
部份服裝提供：MaryQuant
1.巴黎牛油汁配鵝肝煙鴨胸$48
煙鴨胸周圍都有得食，老闆於是同供應商一齊諗計，將鵝肝釀入鴨胸，賣相特別兼有雙重口感，法式牛油汁味道酸甜，唔錯。
2.XO醬洋葱蜆肉天使麵$48
Cafe差唔多所有炒麵都用鐵板上，食到最後一啖都仲暖笠笠，鐵板熱力令部份意粉變脆，XO醬份量恰當，微辣但絕不過火。
3.五穀竹筒飯配蜜糖黑椒德國鹹豬手$58
鎮店之寶夠健康，五穀即紅米、野米、糙米、糯米同香米，撈勻香菇好香口。鹹豬手先醃後焗熟，上碟前落鑊炒，好惹味。
4.五味風沙田雞$36
加香草、紅椒、青椒一齊炒，未入口聞到陣陣香味，不過食落有少少失望，田雞肉唔夠入味，不過總算肥美肉厚，補番數。
5.黃秋葵紫菜卷$29
黃秋葵又稱毛茄，即中間可見綠色部份，外面用魚肉同紫菜包住，魚肉做得比魚蛋更彈牙，紫菜綑邊令賣相更靚。
私人古董晒冷
上樓Cafe咋喎，仲要開喺MK咋喎，使唔使畀200萬裝修呀？店員Janet話：「老闆係個古董收藏者，間舖玩懷舊啱晒自己興趣，佢成屋古董，橫掂收埋喺屋企嘥料，咪開間舖順便Show吓自己珍藏囉。老闆阿哥係室內設計師，咪兩兄弟一齊設計呢間Cafe囉。」可惜採訪當日未能目睹這個古董收藏家真面目，不過難得老闆肯將眾多寶貝公諸同好，我梗係金睛火眼昅昅有乜正嘢喇，果然每步一驚喜，淨係門口畀客人等位嗰兩張搖搖櫈已經夠我玩幾十秒，行多兩步Janet又話：「呢幾部電視機同埋收音機，𠵱家喺出面搵唔到㗎喇。」之後仲有吊燈、跳字鐘、大圓鐘，簡直去咗博物館咁。
老闆穿珠仔
我好欣賞老闆嘅堅持同耐性，Janet話：「Cafe好多嘢都係老闆落手落腳整，因為有部份複雜工序無人肯做，唔係就開天索價。」就以貫穿整間Cafe嘅茶色串珠為例，粗略估計起碼過萬粒珠，全部都係老闆兩兄親手逐粒串，一個字，勁！仲有，80年代區域裏面嘅Designchair，張張有錢都未必買得到，「同大陸代理商買番嚟嘅，個代理商初頭只肯畀貨某意大利傢俬銷售商，唔肯賣畀我哋㗎。老闆同佢哋傾咗成個月，之後做埋朋友，咁先肯賣啲貨畀我哋咋。」估唔到呢張成2萬幾蚊嘅BallChair，無老闆嘅口水同誠意都買唔到番嚟，坐吓坐吓我都唔捨得起身。
60年代區域玩Color
1.入門口，即見60年代典型花碌碌牆紙，紅藍啡各種顏色鮮艷嘅梳化整齊排列，好有Mood。老闆認為60年代係Colorful年代，所以乜嘢顏色佢都要，望落繽紛又古典，好搶眼。
2.紅、黃、紫、粉紅、粉藍，真係乜嘢顏色嘅梳化都有，懷舊花紙係老闆自行設計，再印製黐上牆。
3.鋪水晶燈電線好複雜，裝修公司話每盞要收成萬蚊，老闆於是把心一橫，自己落手落腳安裝水晶燈。
70年代區域玩Design
1.除咗BallChair，呢區每張櫈都好有玩味。
2.呢個區唔止枱櫈玩Cyber，連盞燈都襯到絕，實際燈光就無乜㗎喇，最緊要個Feel夾。
3.60年代玩Color，70年代改玩Design，又玩得幾有型喎。呢個區域靠窗，陽光直射白膠枱櫈，Design玩味十足，加上經典BallChair，簡約型格又Cyber。
80年代區域玩Disco
1.呢區一定屬於梅姐同哥哥Fans，昏暗燈光，配合不停播住跳舞音樂嘅投射螢幕，真係好想起身跳番Part舞。呢區亦係吸煙區，可以煲煙吹水慢慢Hea。
２.呢部小遊戲機唔係古董，喺Disco區域玩到悶悶哋，咪過嚟打吓機囉。
食客有Say
搵食攻略
PancakeColours（23800438）
地址：旺角西洋菜南街168號2樓全層
營業時間：12:00nn-2:00am
交通：旺角地鐵站B2出口
座位：150個，有多個卡位及窗邊座位
人均消費：午餐$40，晚餐$80
有着數：入會費$50，入會後每次惠顧有9折優惠，生日則獲贈甜品或蛋糕，會員另可免費試食餐廳新菜式
最好賣：五穀飯，日賣250份