家陣做分析員，不但要識得睇盤數，更要一眼關七，乜都要知道，包括睇埋娛樂新聞。
話說前日電視廣播（511）副主席方逸華出嚟澄清主席邵逸夫冇大礙，只係肺炎入醫院。昨日晨早即刻有證券行出報告，除咗誠意祝福六叔早日康復外，又表示關注電視廣播會唔會賣盤，真係唔到你唔服。
查實電視廣播傳會賣盤已經唔只一次，冇耐之前曾傳出小小超賣咗電訊盈科（008）後，可能提出收購電視廣播，雖然收尾有人出嚟否認，但里昂證券仍然覺得，六叔年事已高，一旦佢退休，電視廣播賣盤的機會好高，基於呢個可能，認為電視廣播買得過。電視廣播昨日微升0.11％，收45.55元。
講起健康問題，搞診所同埋老人院的卓健亞洲（593），股價最近靜靜地上升，昨日再升5.25％，收3.61元，係52周高位。小初以為係多咗人去睇症，卓健業務改善，但經紀黃話隻股傳有基金睇中，正密密收集。
慕容小初