車路士領隊摩連奴季前講明會為新球季打仗，所以將個頭剪成戰鬥格嘅skinhead髮型，佢自己就大讚好有氣勢，嚟緊仲打算叫班車仔球員仿效佢，實行全部以短髮示人！估唔到摩連奴真係咁鬼專制，連個人形象都想改革埋，咁同我哋清朝嘅「留髮不留頭」有咩分別？
摩連奴想實施「短髮車仔」政策嘅理據唔係話冇嘅，佢解釋班球員喺夏日炎炎成日要練波，天氣又咁鬼熱，如果長頭髮好唔方便喎！摩連奴仲話skinhead係時下「冧巴溫」最型嘅髮型，球員清一色短髮踢波，似足成支軍隊咁，完全符合佢定下新球季打仗嘅要求。
泰利林柏特得寵有因
我求大俠喺度提醒摩連奴一句，球員落球場係為咗踢波，唔係真係諗住「入冊」或者入軍營服兵役，𠵱家連個人喜好都剝奪埋，就點講都唔通！不過無他嘅，球迷留意吓摩帥幾名愛將，好似泰利、林柏特、祖高爾同埋馬基列尼，全部唔係鏟青頭就係陸軍裝，唔怪知得佢哋咁鬼得寵，呢啲嘢冇得呃人嘅。
大家睇吓車仔嘅長髮代表基斯普、卡維奴同已經離隊嘅文尼捷，全部頭髮都長過個膊頭，佢哋冇正選打你都咪話唔關把長髮事。
「其實係咪長髮關摩連奴鬼事咩，至緊要場場交足表現；如果個球員把頭髮長到拖地，但佢又場場入幾粒幫球隊贏波，你慌摩帥唔用你？」