銀行競爭大，話之你大行細行，服務多元化之外，仲要全方位先留得住啲客。好似滙豐咁，今個暑假就為九十個後生仔女，開咗個暑假銀行訓練班，學吓銀行實際運作，再出動埋銀行嘅高層，聽佢哋嘅專題滙報。服侍咁周到梗係有原因，事關呢班參加者嘅父母，係卓越理財嘅大客！ 做得卓越理財嘅客戶，資產總值至少百萬港元以上，滙豐今勻搞暑期班，用嘅人力物力有限，但可以冧吓班大客，又可以早一步捉實班潛力豐厚嘅後生仔女，一舉兩得。 滙豐話呢個計劃叫「成才組合」，最終揀咗九十個16至18歲嘅後生仔女，個個都好認真！