錯視Tee個Print係靈魂所在，希望件Tee唔殘，個Print冇咁易甩着多幾次，打理一定要有技巧。專賣Tee嘅AMBERUNION店主Terry就教路打理Tee嘅5大法。
1.最好用手洗
用手洗有Print嘅Tee就最好，切記唔好用含漂白劑嘅洗衣粉，用40℃以下嘅溫水或凍水浸30分鐘左右，再用手搓兩搓，留意勿用手搓Tee的圖案表面，更不要過份大力搓領口部位，以免領口變形。
2.反轉放入洗衣機
如果習慣用洗衣機洗，切記將圖案嗰面反轉向內放入洗衣機。洗滌完成後，馬上從洗衣機中取出，不要用亁衣機弄亁以免過份強力令Tee變形。
3.最好風亁
洗完之後扭亁多餘水份，用衣架晾起，應小心衣架只能從Tee下襬寬鬆地方伸入去，切忌直接從領口部位強行撐入，以免領口失去彈性後鬆弛變形。晾曬時候，要自然晾亁，避免太陽直接照射圖案之上。
4.中溫熨Tee
晾亁後可用中溫蒸汽熨斗熨（含彈力纖維嘅衣物不可高溫熨，會破壞彈性纖維組織結構，影響衣物彈性效果。），切記不要在圖案上直接熨，否則會引致圖案變色。
5.摺起收藏
因為假如用衣架掛起，Tee領位、肩位除咗易變形，衫身更隨時會變形或變長，所以Tee最好摺起收藏。天氣潮濕蟲蛀會容易令Tee多咗一個二個洞，以防萬一放定一兩粒防潮防蟲產品入衣櫃。