日做夜做，乜都會麻木，煮麵師傅阿米一日淥幾百個麵，唔單止麻木，連手臂背脊都麻痹：「舖頭叫得做『八麵玲瓏』，客人入得嚟就梗係食麵㗎啦，我一日起碼要淥二三百個麵，最勁試過淥400個，攰？講真個麵唔係重，未至於令雙手肌肉痠痛嘅，反而條腰仲攰，因為成日要彎低身攞麵，所以一放假我就要返大陸揼骨㗎喇。」拍攝期間，我企喺師傅隔籬，嘩！好熱呀，點頂呀？「淥麵就係辛苦在個熱字，啲水一直滾啲蒸氣一路蒸上嚟，我就一路流汗。」
我無厘頭一問：「阿師傅，日淥夜淥，你仲會唔會食麵呢？」阿米做個無可奈何嘅表情：「初頭入行做西餐，嗰段時間我無食過牛扒；近幾年淥麵，我都好少食麵咯，淥麵淥咗半年左右，見到麵都覺得厭。不過又好難完全唔食麵嘅，始終麵係中國人主食之一，𠵱家夏天，無乜胃口我都會食吓湯麵。」講講吓老闆區先生出場：「我哋嘅麵全無防腐劑，只可以擺一日，每日賣剩嘅麵我哋都會掉晒，如果放隔夜啲麵條就會斷，所以成本比一般麵食店起碼高一半……」無心機聽落去喇，阿師傅講到咁辛苦，我即時點咗碗兩麵夾攻，慢慢食，用心食，或者係心理作用喇，我覺得真係好好食。
記者：黃若茵
兩麵夾攻$35（包熱飲）
名字十分搞鬼，所用的兩款麵分別是日本一級拉麵及營養菠菜麵，十分滑嫩，配以秘製醬汁煮製的南京牛肉，為清淡健康的麵添加惹味香氣。
魚腐鴛鴦菇五穀稻糧桶飯$52（包熱飲）
今屆食神爭霸戰入圍菜式，用紅米、麥米、糙米、香米及黑糯米煮成五穀飯，用木桶盛載保溫效果極佳。鴛鴦菇分別是茶樹菇及鮑魚菇，味道新鮮。
海鮮雜燴泡飯$39（包熱飲）
泡飯湯底是自家熬的清雞湯，天然健康，海鮮用上蝦、帶子、斑片、魷魚，鮮味跟清新的雞湯味道非常配合。
八麵玲瓏（21481198）
地址：旺角砵蘭街215號朗晴坊3樓