侍仔：真係冇天理！打假波上訴竟然可以減刑！費倫同埋拉素唔使降班，只係扣多幾分！點解會咁？擺明打假波㗎啦！
菠蘿文：算數吧啦，意國足總從未畀到我佢係公事公辦嘅感覺。祖記晨早搶咗降班嘅位啦，意足總唔會再畀多兩隊佢認為對球壇有所謂「巨大貢獻」嘅球隊離開意甲。
招積域：唉，做錯事唔使罰，就係因為佢以前有幾咁「偉大」功績？
侍仔：就咁當冇件事發生，以後唔再睇意甲！成個聯賽都係假波，但冇人去整治。
菠蘿文：乜你好想睇到一個冇費倫、又冇拉素嘅意甲？
侍仔：拉素唔睇都算，但冇費倫就點樣都唔得。我偶像戰神「巴廸高」以前係費倫主將，佢當年跟費倫降班再升番上嚟，有義氣過乜嘢廸比亞路！戰神當打之齡同你踢意乙，係費倫嘅忠臣！
招積域：侍仔係咁矛盾㗎啦，想執正做但又驚意甲失去號召力。平日你睇直播，祖記個主場幾時會爆滿？真係以為係播緊季前熱身賽。
菠蘿文：所以咪唔降佢哋落乙組囉！
侍仔：意甲……假波勝地。
高路斯轉會德甲欠吸引
菠蘿文：紐記如果簽咗高路斯，前鋒攻力有保障！
招積域：都係睇定先，世界盃神射手唔係個個之後都有好表現。
侍仔：但我信得過高路斯，頭又得腳又得。不過連佢都走埋，德甲仲有咩吸引力？前日辛特退休，今日又高路斯轉會。
菠蘿文：出面條件好，踢波前景同自己進步都會大好多啦。德甲自己唔爭氣啫，又唔見意甲、西甲同英超有呢類煩惱？
文︰高洛文