網上好多熱門討論區，時不時有人問應唔應該買樓，市淡怕買貴咗，市旺就驚買遲咗更加貴。講真，如果吹水都當真理，出面班投資專家同埋高薪分析員乞食都似。其實，近幾年樓市都係豪宅先行，班有錢佬嘅投資觸覺，點都強過網上亂吹水唔使負責任嘅人。
中原黃良昇啱啱整理咗個統計，佢話今年截至7月20日，全港30個主要豪宅屋苑，總共錄得910宗成交，總值超過101億。其中三個豪宅，唔夠七個月已經分別錄得超過100宗成交。黃良昇話，咁嘅數據顯示，班用家同投資者對後市樂觀，保持住穩定嘅入市步伐。
目前最多成交嘅係薄扶林貝沙灣，有110宗，總值14億幾，其次係錄得109宗嘅西半山寶翠園，第三個係有105宗嘅尖沙嘴擎天半島，兩個豪宅屋苑買賣合約總值都係8億幾。如果加埋第四同第五位嘅又一村又一居（73宗）同埋火炭駿景園（58宗），5個豪宅加埋已經有455宗成交，佔30個豪宅成交總數嘅五成。至於另一新貴係尖沙嘴凱旋門，有52單交易。
有錢佬買豪宅多數係視為投資，佢哋都肯買貨，個市衰極都有個譜嘅。
電郵地址：[email protected]