Twins前晚聯同張茜及吳京，齊到位於番禺的長隆野生動物園趕拍新片《雙子神偷》。由於選在夜間開工，河馬十足小朋友般扭眼瞓，尾巴四擺，將身上的水fing到阿嬌身上，把她弄得渾身濕透，阿Sa則表示白色緊身戰衣令她激凸，甚為尷尬。
以雙生兒作賣點電影《雙子神偷》前晚在番禺拍攝，該片原由跳水王子田亮擔任男主角，但因對方以患病為由遲遲未開工，故電影公司決定易角，改由吳京擔演，此戲也隨即密密趕工。
在戲中飾演空中飛人的Twins連日來內地香港兩邊走，剛在港出席完音樂會，隨即趕到位於番禺的動物園繼續拍攝工作，與河馬、山羊等做對手戲。成員蔡卓妍（阿Sa）自言拍此戲時十分尷尬，她解釋：「我要着件白色貼身衫吊威吔做空中飛人，因為件衫太貼身，將身材表露無遺，真係覺得好尷尬。」
着T-back打冷震
鍾欣桐（阿嬌）也不好過，慘遭河馬戲弄。事緣拍攝大隊在夜間開工，河馬從水裏走出來時，竟像個小孩子般扭眼瞓不停擺尾巴。
阿嬌說：「當時我哋要拍一場謝幕戲，所以河馬要由後面行上嚟謝幕，不過佢唔係好聽話，將身上啲水fing到我成身濕晒。」
吳京談到「執田亮二攤」時說：「係小明哥（徐小明）叫我幫手，但佢哋冇講我係唔係代替田亮嘅角色，因為我收到嘅劇本已經係第七稿，不過我都唔會介意。」
SunBoy'Z成員張致恆在戲中飾演性商店老闆，他笑言曾收過一條T-back作禮物，還說：「我試着過一次，打冷震，所以以後都唔敢再着。」
採訪、攝影：曾小嘉
