山西省省長于幼軍來港推廣山西，佢話油價高企，而山西多煤炭，用煤化工替代石油化工產品，可大幅降低成本。呢一招果然有效，台灣首富郭台銘、本港富商李兆基嘅中華煤氣都話去投資。
于幼軍噚日喺香港總商會午餐宴上，派定心丸叫外商放心去投資。佢話為免政府官僚將「外商打成內傷」，已改善政務環境，例如剛於7月要求十五個廳嘅廳長，去電視台直播政務工作，連播咗三日，又喺報章刊登全文兼配上官員照片，話辦事唔兌現，「人民便跟你過唔去！」又設監管機關專門處理投訴，若辦唔妥，「你不處理人，人就處理你！」
山西作為煤炭大省，煤礦意外係大問題。于省長話去年上任後，已經關掉4800個違規小煤礦，今年會再關1400個，之後就要為當地煤礦引入高新技術及完善監管系統，將礦難大幅減少。
問到中央對內地房地產投資過熱情況，進行連串宏調措施時，于省長答得好妙，佢話山西省房地產最大嘅問題，係遠遠未有熱過！