港島中環同金鐘區甲級商廈供應少之又少，市場預期個價仲有得上，所以買家入到4至5厘回報嘅貨都算合理，估唔到市場仲有超過5厘嘅筍盤㖭。
美聯香港商業部高級營業經理羅仲英話，早前公司獲業主委託獨家代理嘅金鐘海富中心701A單位，日前以交吉形式，用約1222萬元賣咗，單位約1880方呎，呎價6500蚊。
羅仲英講，買家係長線投資者，周圍搵商廈物業已經一段時間，由於美國加息壓力放緩，信心即時增強，所以決定入市。𠵱家海富中心同類型單位，呎租約29至30蚊，計番回報有5.4到5.5厘。
講開港島區寫字樓買賣，中原香港商業部助理營業董事李百堅報料，上環北海商業大廈14樓全層，面積約1792方呎，以約400萬轉手，呎價2232蚊，創該廈呎價新高。買家買入作自用。