升岡啱啱公布業績，全年賺多五成，小股民已經飲得杯落，不過主席劉錫康就話「養馬好過做生意」！咁又難怪，早年佢嘅愛駒「靚蝦王」贏咗超過3700萬獎金。
就算老馬退役，淨係搞配種都已經好和味。劉錫康話，佢另一名駒「正蝦王」𠵱家八、九歲，喺澳洲墨爾本每年都配種60次，每次盛惠8800蚊澳幣，成5萬幾蚊港紙，呢個價只可以話係合理，有啲名種馬要收2萬蚊澳幣，但都排晒長龍等配種！
唔講唔知，原來配種要「包生仔」，如果隻馬仔養唔大，唔夠6個月嘅話，馬主就冇錢收！「正蝦王」每年成功繁衍44隻馬仔，真係超精壯，咁每年養馬皮費呢？原來不過係萬零蚊澳幣，咁即係每年淨袋200幾萬港紙！難怪劉生好感慨咁話，靚馬難求，佢仲話個市呢排炒到15至16萬澳幣一隻㖭。