昨日東方海外（316）股價配合大成交炒上，原來東方海外在公司網站話已委任投資銀行，將旗下在北美洲的碼頭業務出售。由於上次和黃（013）賣碼頭賣到好價錢，所以投資者憧憬東方海外今次亦會大賺一筆，股價先行偷步炒上。
東方海外昨日升9.39％，收30.30元，成交股數524.24萬股，金額1.55億元。
經紀黃話，昨日花旗幫東方海外計數，話就算賣得成碼頭業務，每股最多都係升值2至3元，所以維持沽售評級。不過，有芬佬又唔係咁計，話起碼多十蚊八蚊。
小初心諗，人哋剛剛計劃賣碼頭業務，照計有排先至傾得掂，咁快就炒定先，似乎早咗啲。此外，呢個屬對股價敏感消息，點解唔見公司有正式通告呢？
另外，曾經因為生產MP3賺大錢的先思行（595），昨日公布全年業績，盈利勁跌96％至834萬元，公司仲話要搞業務轉型，其實MP3曾經令好多廠家賺錢，家陣只係反映潮流轉變。
慕容小初