肥彭終於離港，呢一股旋風都算厲害，佢嚟咗六日，差不多日日都有新聞，煲呔都要迴避。八方見到肥彭，問佢會唔會考慮回港定居，佢笑話一定唔會，因為佢嘅屋企喺倫敦、牛津同埋法國，佢仲話去完上海，就會去西班牙玩。但肥彭對香港前景仍然好樂觀，又話香港係亞洲最自由城市，最終一定有民主喎。
八方見佢愈食愈肥，叫佢不如學吓香港人瘦身，點知佢一聽到keepfit兩個字，就一支箭咁飛走咗。呢一次，聽講佢賣咗成一萬本新書，每本百四元，好肥。
見到肥彭，大家都會諗起佢幾個女同佢啲狗，咁就向大家報告一個壞消息同一個好消息。前者係「威士忌」都去埋陪「梳打」，即係死咗。好消息呢，就係細女雅思Alice（圖）就快同男友Tim拉埋天窗，佢就快做肥外父。