中國改革開放多年，𠵱家啲國家企業動輒每年營業額過百億元，過千億嘅亦大有人在，但係佢哋啲老總嘅人工就好似時光倒流七十年咁，自然周不時會聽到某某國企老總貪污出事。家吓市場開放咗喇，咁點解決報酬問題呢？原來佢哋唔單止財務及企業改革，家吓人工嘅評核亦進步咗。
話說聯通副總裁李正茂出席新華網節目被問到年薪時，佢話中央級國企嘅薪酬完全按照國家規定執行，即係工資水平由政府部門核定，原則係工效掛鈎。簡單啲講，就代表國家出資嘅國務院國資委，會考核各企業嘅業績，同時將企業領導班子嘅表現同業績比較。所以國資委雖然對外公布，中央企業第一把手嘅年薪大致維持喺咩水平，但亦會因企業、地區環境不一而有出入。
李總又話，聯通高管基本上亦按呢套規則嚟做，每年情況唔同。有啲年份效益等各方面都好好，考核分高啲，薪酬就高啲。當中仲有啲激勵同約束嘅機制，再唔係過去簡單咁講人工有幾多。
聯想楊董收入突出
雖然聯通班老總舊年人工唔見突出，不過，華華就諗起舊年兩間表現好好嘅國企，一間係純利達535.9億人民幣嘅中移動，佢老頂王建宙05年人工連花紅有成650萬。另一間就係收購咗IBM個人電腦業務嘅聯想，落實國企衝出海外計劃嘅聯想董事長楊元慶，舊年花紅連人工就有成2170萬，直頭可以媲美跨國企業老總。