孫柏文由細到大都好鍾意做運動，而我相信大家作為我嘅醒目fan屎都知道經常做運動嘅好處，所以我都唔會重複做運動嘅好處去呃字數，我只可以講句，游水游得多，炒股笑呵呵。
以前讀書嘅時候，我最喜歡參與嘅體育活動，就一定係排球。不過大學畢業之後，特別係出咗來做嘢，就發覺愈來愈難湊夠十二個人同一時間去打排球，所以就開始研究其他可以獨自做嘅運動項目。
我試過行山、跑步、做gym等等活動，不過一係就覺得會容易受傷，如果唔係就嫌會大汗叠細汗，所以好耐都搵唔到真真正正鍾意獨自做嘅運動項目。即至到有一日，有個朋友問我想唔想陪佢去游水，我就問佢：「游水有乜好？」佢就答：「游水好！因為關節唔會撞擊，所以受傷嘅機會比較微，一齊去啦！」
我就細細聲話：「我都係唔想。」我嗰個朋友就繼續sell：「游水真係好㗎！因為游喺水中，啲水會幫你散熱，根本唔會大汗叠細汗。如果好彩撞正水溫低過攝氏27度，消脂嘅速度亦會大大提高，你咁肥，仲唔來！」
聽落雖然合邏輯，我都係答：「我第日先至跟你去啦。」我哋嘅對答到咗呢到，我個朋友都好似要放棄咁，自己去游水。不過佢臨離開之前同講我咗最後一句說話：「游水嗰度有好多靚女俾你昅。」就令到我冇經大腦、反射式咁叫：「Ok，let'sgo！」（好，去囉！）就係咁，我就開始慢慢培養對游水運動嘅興趣。
其實喺我哋特區，真係有好多畀人享受游水樂趣嘅地方。首先當然要分成兩大類別，第一就係海灘，第二就係游泳池。不過好似前特區奧林匹克游泳代表方力申話齋，如果想知道自己游緊去邊度，最好都係喺泳池裏面游。不過泳池都要分兩大類。第一就係私家泳池，第二就係政府泳池。
大家可能知道，喺我哋《蘋果日報》辦公室大樓，有一個游泳池。而我作為一個撰稿員，其中一個員工福利，就係可以去到該泳池游水。咁噚日，我老友何洱緣打電話畀我，問我想唔想同佢一齊去佢附近嘅政府泳池游水，我就同佢講：「游水都好，不過我唔使去到咁遠游，我要游就去辦公室大樓嘅露天游泳池就可以。」佢話咁自己一個人去政府泳池游水算數。聽完佢嘅電話之後，我都走去大樓泳池。
點知，去到泳池只見到個牌寫住「雷暴警告，泳池關閉」。我都好掃興咁番辦公室繼續寫作，點知，過咗兩個小時之後，我老友何洱緣打電話畀我，問我游水游成點。我就反問佢：「雷暴警告啊，乜你有得游水咩？」佢話有，仲要解釋點解我冇，原因係原來政府游泳池屬於康文署管理，游泳池主管可以決定繼續開放游泳池畀市民游水。不過，私家泳池屬於食環署發牌機制之下，如果一有天文台發出雷暴警告，就算該區天氣晴朗，都要硬性規定立刻關門。
我問佢點解政府有呢個政策分別，佢話佢都唔知，所以我就走去問其他比我醒目嘅同事同一條問題。最後，有個同事絲絲就答到我：「因為去得私家泳池游水嘅人，條命都值錢啲，而游政府泳池嘅就冇咁值錢，所以被雷劈都冇所謂。」咁都得？聽日，就講利世民嘅答案。我都希望大家可以去到《金手指》留言區，畀你哋啲答案我諗吓。
孫柏文