侍仔：埋位啦喂！今日本店做緊大特賣，買奶茶送咖啡，買滿20蚊以上送1張3蚊coupon。
菠蘿文：你老細儍咗呀？係咁送嘢出去。
招積域：我話知你，幫我寫杯凍奶茶少甜少冰多奶。
轟莫耶斯出主意
侍仔：佢話要提高人流，所以搞呢味嘢，人哋跟唔跟就唔知啦。今朝上網睇到朗尼喺本自傳發炮狂轟莫耶斯。
菠蘿文：嘩！呢個衰仔咁反骨？當初係莫耶斯提拔同畀機會佢㗎喎，𠵱家反轉豬肚？
招積域：其實件事係點樣呢？
侍仔：死肥仔話當初佢自己想過檔紐記，但莫耶斯就幫佢出主意，結果就去咗曼聯。𠵱家肥仔話好唔妥佢當年咁做，再加埋喺球場上開拖，就到𠵱家爆大鑊。
菠蘿文：莫耶斯都係為佢好啫，當初轉會前都有同費Sir坐低傾點樣培育呢個死肥仔啦。
招積域：後生仔就係鍾意自己出主意，朗尼都係因為咁先發脾氣。但佢𠵱家咁爆出嚟，我覺得以費Sir咁小器嘅人，𠵱家已經物色人選代肥仔個位。
侍仔：朗尼仲有排踢喎，咁快搵定人？費Sir唔係咁容易搵到人啩……史譚、華朗、碧咸……朗尼？
菠蘿文：點計都係朗尼唔啱，對自己恩師咁絕情，呢個人遲早變加斯居尼。
侍仔：唔好提反骨仔，巴西搵咗鄧加做教練喎。
招積域：呢位前隊長可以令球隊團結，即使連肥哨都要聽佢點。
菠蘿文：巴西隊永遠都有肥哨呢類特權分子，畀我就唔會再選朗拿度入國家隊。
文：高洛文