已屆98歲嘅無綫電視主席邵逸夫（人稱六叔）日前忽然入咗九龍城聖德肋撒醫院，因為六叔年事已高，佢入院嘅消息一傳出，流言四起。噚日好多記者捕喺將軍澳電視城等方逸華，眼見群情洶湧，六嬸於是特別喺電視城一個會議室安排簡單記者會，被問到六叔係咪仲喺留院，六嬸話：「其實佢返咗屋企，我日日都會畀時間佢出嚟，見吓醫生朋友傾吓偈。」
至於邵爵士嘅身體狀況，佢話「邵生上個月25號星期日開始咳，有少少發燒，之後送佢去睇醫生，醫生都話佢冇乜事。當時醫生畀咗消炎藥同咳藥水佢食，食藥後都退晒燒，其實都係半度燒啫！但係自嗰次之後，就一直都有咳，睇番醫生照肺，就話有少少肺炎，有少少痰，𠵱家就食化痰藥幫助化痰。」
八方屈指一算，六叔入院前一日，仲同老婆好恩愛咁去食黃油蟹。六嬸噚日強調，丈夫身體無事：「冇乜特別，六叔一直有驗身，唔係咁嚴重，畀時間老人家休息。」