兩個多月前，在粉嶺一宗街頭搶劫案中被兇殘賊人用刀刺穿腎臟、一度命危的16歲少女麥麗君，憑着頑強的生命力戰勝死神，留醫一個多月後終於出院療養，「醫生話我係萬中無一咁好彩！」日前，麗君在家中向本報親述遇襲經過。
「我冇嬲嗰個人(兇徒)，但我亦都唔會原諒佢，我唔明點解佢會為咗一部手提電話而要咁做。將來如果有機會(庭上)見到佢，我都唔會驚。」麗君邊說邊低頭垂淚。
記者問她若可重新選擇一次，會否同樣作出反抗？麗君毫不猶豫便答：「俾我揀多次我都係會反抗，因為係自然反應，就算我唔反抗，結果都可能係一樣。」
麗君的母親麥太亦坦言不會憎恨兇徒，卻想痛罵他一頓。「唔發生都發生咗，都冇話憎唔憎，但俾我見到佢，我一定鬧佢做咩要咁蠢？我個女同佢唔相唔識，做咩佢要咁做？」
昏迷10天蘇醒
案件發生於今年5月5日，在粉嶺一間公司任職辦公室助理的麗君，外出午膳後返回公司途中被賊人強搶手提電話，麗君奮力反抗，賊人惱羞成怒用刀將她重重刺傷(遇襲經過見另文)，麗君的左邊腎臟及部份肝臟被刺穿，須動手術切除，情況一度危殆，昏迷約10天才蘇醒。
「醫生話我失血半個鐘，同我輸咗好多血，仲要問其他醫院借血，佢話我好得番，係萬中無一嘅例子。」麗君哭道，在深切治療部的日子十分難熬，每天不是打針便是抽血，雙手和大腿都滿布針孔和瘀痕，她又試過因為呼吸不暢而以為自己快要撐不下去。頻密的嘔吐更令她一度萌生死念。
「一日嘔十幾次，又食唔到嘢，真係好辛苦㗎。」麗君憶起住院期間的痛苦經歷，又再淚流滿面。
麥太忙不迭拿紙巾為女兒拭淚，卻沒為意她比女兒哭得更厲害。「佢真係受咗好多苦，醫生都有幫手安慰佢，話佢條命好難先救得番，千祈唔好亂諗嘢。」麥太說。
胸前呎長疤痕
麗君留醫一個多月後，於上月底出院，但仍未算完全康復，原本體重105磅的她，目前只剩80磅，身體極為虛弱，胃口欠佳，只能喝湯和營養奶。
麥太指，麗君的胸前除留下逾呎長的手術疤痕外，左腰背的傷口亦留下一個兩吋乘兩吋的傷疤；此外，體內亦有瘀血積聚不散，下月中需照超聲波查看情況。
40歲的麥太坦言，以往對麗君管教甚嚴，甚至不准她上網，怕她結識壞人。惟經歷今次劫難後，她明白到女兒開心、健康才最重要。
蘋果日報慈善基金曾於早前發放15,000元緊急援助金給麥太應急，近日另將善長捐款合共30,760元給她簽收。麥太表示，丈夫任職散工，收入不穩，卻要應付她與麗君及14歲幼女的生活，十分緊絀，善長捐款對他們幫助極大，她對此深表謝意。捐款編號：C2029
