嗰日(5月5日)下晝兩點幾，我同老闆同埋老闆娘食完飯，差唔多行到番公司樓下，有朋友打電話畀我，我拎起手提電話傾，放慢腳步，有個長頭髮嘅男人由對面馬路走過嚟我左邊，想搶我部電話，我嘅自然反應就係同佢拉扯，跟住就大叫搶嘢。當時街上好多車，但就冇乜途人。
活過來萬中無一
隔咗一陣，佢唔夠我搶就鬆咗手，我即刻向前走，幾秒之後回頭望，見佢喺腰間拎咗一把幾吋長嘅刀向我走過嚟，然後插入我嘅左腰側，跟住就逃走，老闆見到之後就幫我追個賊，當時把刀仲留喺我身體入面。我用手將把刀掹番出嚟，當時一啲都唔覺得痛，淨係見到流咗好多血，成手都係，我挨埋牆按住個傷口，有途人扶我坐低等救傷車，我暈咗一陣，後嚟喺救傷車上面醒番，開始覺得個肚好痛，係咁大嗌，救護員叫我唔好郁，跟住我又再暈番，直到母親節當日(5月14日)我先醒番。醫生話我係萬中無一咁好彩。
註：麥麗君口述、記者筆錄