每晚途經佐敦，必見一大隊着搶眼黃衫嘅印度仔，攞住兩條高過人嘅Banner，係威係勢咁大叫：「佐敦咖喱！佐敦咖喱！」呢句可能係佢哋唯一識講嘅廣東話（以下係我用有限加佢哋有有限嘅英文對答，繙譯成中文見報），加入宣傳隊伍已大半年嘅Gulbahar話：「我哋唔識講廣東話唔緊要，最緊要傳單有中文字，餐廳有同事識講咪得囉，我哋係食正宗印度咖喱，梗係要搵番我哋呢班原汁原味嘅印度人做宣傳先夠正宗。」Banner黃底黑字大大隻，離十呎遠都望得到，宣傳無錯夠浮誇，但成效又如何先？「好多人都會拎我哋嘅傳單，6成攞咗傳單嘅人都會去舖頭試我哋嘅咖喱㗎呢！」堅定流我就唔知，不過餐廳負責人就話：「有9成香港人幫襯我哋，其他嘅係印巴或外籍人士，所以宣傳好重要，我哋成個隊伍有氣勢有聲勢，咁先吸引到新嘅客仔㗎！」
行過見到宣傳隊伍覺得好有睇頭，但見佢哋熱辣辣企喺條街，就有啲戥佢哋慘，不過佢哋又唔係咁諗噃，Gulbahar話：「It'saneasyjob！賺幾多人工就唔方便講喇，但我哋一晚都只係開四五個鐘頭工，絕對唔辛苦，不過支Banner上重下輕，好考平衡力，啱啱拎Banner都覺得手軟㗎，𠵱家慣啦，我哋部份隊員仲係學生哥，做宣傳嗌口號呢類咁簡單嘅工作就可以賺到零用錢，真係唔錯㗎呢！」
記者：黃若茵
燒烤大蝦$88
嫌咖喱一味得個辣字，不如試吓呢個大蝦。大大隻蝦肉質夠豐厚，搽薑油同蒜茸後再燒，包你話惹味！
特汁香燒雞柳$45
建議唔好揀大辣，否則辣味會冚晒香口雞肉味，揀小辣或中辣就啱啱好，洋葱同番茄煮出嚟嘅汁都好清新。
咖喱牛腩$45
最受香港人歡迎嘅菜式，牛腩夠腍咖喱夠香口，咖喱汁跟牛腩完全融合，每啖都食到咖喱香料味，必試！
食客點睇
佐敦咖喱（27805545）
地址：佐敦吳松街47號地下