新一集的《超人》有點哎呀，哎呀的意思是跟想像中有出入，挺大的出入。新《超人》靚仔得像模特兒公仔，一顰一笑又帶點楚楚動人，又經常性保持着一股尷尬靦覥的少女味，跟原本心口有個S字，起飛前會大大聲嗌UpUpandAway的超人，質感很不一樣。
《X-Men》的年青大導演BryanSinger捨《X-Men》第三集不拍而執導此片，《超人》喎，梗係拍啦。找來了一位新人BrandonRouth飾演超人，靚仔就夠晒靚仔，架起粗邊眼鏡也有「簡基勒」Feel，但始終陽剛氣不足，太十全十美、太順攤、太成個世界佢孭晒，不帶丁點壞，連頑皮也不頑皮，很難投入。
睇《超人》最鍾意睇超人救嘢，救嘅嘢越難救，單嘢越大單就越好睇，電影的前半部份，超人勇救穿梭民航機，在有幾萬觀眾的球場中央擺晒甫士降落，精采刺激，超人便應該是這樣。然而在電影的後半部份，超人唔救人不突止，仲成日要等人救，一個成日等人救嘅超人確係幾煩厭。反派陰謀也模模糊糊，又話種咗啲地出嚟之後會死幾億人，之後但又唔見有乜動靜兼匪徒叠埋心水鋤大D，強如KevinSpacey也無甚發揮，雖然Spacey跟導演Singer是老拍檔，但似乎Singer這次將全副心神放在拍攝新超人的靚仔樣上，好心機過彭浩翔拍梁洛施做依莎貝拉，靚得教導演心折。
我還是較喜歡那個臨起飛前會鬼殺咁嘈，遠遠聞到黑氣石陣除就會頭暈身慶嘅膚淺但親民的超人。