喺新一季英格蘭超級聯賽，贊助商將會提供全新足球畀賽會，作為今季英超聯比賽嘅專用新波，亦即係話對於一眾英超門將嚟講，又會係另一個噩夢嘅開始。
亨利試過都話勁
無論係三間品牌抑或一剔品牌出產嘅足球，都講求外形設計同物料，而且每出一個全新足球，賣點都會放喺球速上面；今次全新設計嘅英超聯官方足球，特點係所用物料會令到足球重量更輕，從而令到球速更快，而呢個全新足球亦已經搵咗阿仙奴嘅超聯神射手亨利試過，佢都話勁。
有新足球面世又再次加快球速，對於喺英超效力嘅前鋒、中場球員當然係好事，會更容易取得「士哥」，但對於門將嚟講真係唔好受，過去所用嘅專用足球已經令到唔少門將出錯、出醜，甚至有門將投訴嗰波太輕、太飄，好難捕捉來勢，結果就咁樣失手。
作為球迷，當然希望睇波時候會有更多精采入球喇，好似世界盃決賽周，有唔少入球來自遠射，某程度上都會同採用嘅專用足球有關，球迷有入球睇自然有滿足感。今次英超聯轉用全新足球，我求大俠同球迷一樣有期待，話晒英超有唔少中場重炮手，除咗林柏特、謝拉特外，重有傷癒嘅史高斯，新加盟車路士嘅波歷克亦係外圍重炮佼佼者。
「??家效力西甲聯皇家馬德里嘅巴西後衞卡路士係罰球專家就係人都知，如果車仔最後真係斟到佢過檔，呢個英超全新足球就真係好值得期待嘞！