七月十八日本欄寫《電話今非昔比》，靚女記者Ｇ睇完打電話嚟：「我同意你嘅講法，只係有個日子可能搞錯咗。我記得九六年我重未畢業，九八年我就訪問過電訊管理局，政府賠錢畀香港電訊，好似係在九八年，唔係九六年。」
記者Ｇ認真熱心，隔咗一日就電郵啲資料畀左丁山。睇真啲，一九九五年七月一日開始，固網市場開始引入競爭──和記電訊、新電訊、新世界電話三家公司獲發牌照與香港電訊競爭，之後港英政府開始與香港電訊展開「終止專營牌照」談判，其後遇上九七回歸，由特區政府下決定，卒於九八年一月二十日雙方簽訂協議，由財政司司長曾蔭權代表特區政府。於九八年三月三十一日，香港電訊交出香港國際電訊牌照，九九年一月一日開始開放對外電訊服務市場，二○○○年一月一日開始開放對外電訊設施市場。
香港電訊與特區政府達成協議，喺九八年三月三十一日交還「對外線路與電話服務專營權牌照」，比專營權屆滿日期（二○○六年十月一日）提早咗八年半，代價係臨時立法會財務委員會於九八年二月二十七日通過以六十七億元補償「香港國際電訊」。
以上日期，冇否定到賓架Ｃ喺七月十八日嘅講法，即係港英政府老早部署九七後嘅電訊市場，等大東控制嘅香港電訊收番一大筆錢，然後伺機賣盤鬆人。如果二○○○年由SingTel（星加坡電訊）買咗香港電訊，後來嘅「鑊仔」就會由星加坡政府屬下嘅公司孭晒。不過，當時科網股全世界炒到㷫烚烚，TMT股股價不斷上升，PCCW要加入搶奪，在當時情況之下，甚合樂觀人士嘅投資邏輯，否則唔會有咁多銀行肯借錢支持啦。銀行只在兩種情況同時出現之下，先至願意借出巨款：（一）借款人有名（名氣加名譽），（二）借款項目嘅還款能力計到數。此兩條件欠一項，銀行都唔會理睬。就好似AOL與TimeWarner合併咁，當時好多人拍掌讚好，舊年梅鐸就講，AOL與時代華納係在飲醉酒情況下合併嘅。