做《星級推介》，約Toby（梁靖琪）影相做訪問，佢提供3間餐廳，其中兩間都係火鍋店。上網翻查資料，原來Toby最鍾意打邊爐，難怪。以前喺加拿大讀書生活已經狂打邊爐嘅佢，今日影埋相瞓身支持Hotpot，好，就畀佢做一日權威聽吓佢噏乜啦。
記者︰方綺君
攝影︰林栢鈞
邊爐狂食到變肥妹
今日Toby推介「樓上樓」，埋位影相，自細愛火鍋嘅佢未食先興奮。侍應捧出碟碟火鍋料，佢一見到心頭好就真情流露大叫︰「嘩，好新鮮，咪以為今日要影相先整得咁靚，我平時嚟食都係擺得咁靚㗎。」本身已經食過午飯嘅我，都被Toby嘅叫聲引到肚咕咕，搞到我都想食埋一份。「我喺加拿大嗰陣已經成日同屋企人打邊爐，幾十蚊加幣任食，咁抵，梗係狂打喇。」食得咁狼，難怪Toby曾經食到變成體重高達140磅嘅肥妹仔，𠵱家減肥成功，可以瞓身擺個S形Pose：「不過減肥還減肥，我都唔會太刻意戒口，𠵱家打邊爐，我照狂掃牛肉。」
必食四寶
Toby至愛食乜？「次次打邊爐，有4樣嘢我必叫，蝦、牛、西蘭花同心太軟。」佢鍾意打邊爐前食番幾隻蝦刺身，點解？「火鍋味道濃烈，未正式打邊爐前先食，味蕾先感受到蝦嘅清甜。」香港人打邊爐出名個個牛魔王，Toby都唔例外：「我食牛數量用磅計，每次嚟到都要食番三五七碟。」西蘭花呢？「臨擺入口前，我習慣將西蘭花浸一浸熱湯，等西蘭花吸收湯底精華，之後一啖咬落去，湯汁喺口裏面爆發，雖然幾辣口吓，不過咁先食到湯底滋味。」火鍋店居然有甜品心太軟？無錯，「樓上樓」不只主打火鍋，仲提供家常特色小炒、壽司同甜品，勝在選擇多水準高。
澳洲A3和牛厚切$298
Toby：「和牛厚切肉質軟腍，煮熟有嚼勁，而且係上等澳洲A3級和牛，一定唔會嚡口，我話嘅。」
海鮮拼盤$198
Toby：「每次去『樓上樓』，嗌親海鮮拼盤啲配料都有分別，今日就有花蟹、大蜆、蝦同埋蟶子，夠新鮮就一定好味道。」
火鍋推介
釀雜丸$60（釀餡加$10）
Toby：「點鮮蝦丸、鮮牛丸、鮮豬肉丸、鮮墨丸、鯪魚球，可以自選鵝肝、芝士、烏魚子、鹹蛋黃、西蘭花同蟹膏6種餡料釀入丸，味道正時加分，加$10絕對值得。」
火燄龍蝦湯$168起
Toby主持點火儀式：「有大大隻龍蝦、蜆等海鮮，湯底香草味道濃郁，好飲到可以當湯飲。倒湯入鍋，淋些少白蘭地喺面，用火一燒酒香揮發，正。」
其他推介
燒和牛壽司每件$23
Toby：「搽咗饅魚燒汁，味道濃郁，和牛入口即溶無渣，肉質軟綿我食完一件又一件。」
冷麵$68
Toby：「冷麵配3款配料，長崎蟹腳（後）啖啖肉鮮甜；冰鎮鮑魚配魚翅（中）味道最好，至愛嗰種獨特檸檬香；三文魚他他配三文魚子味道就淡少少，無成塊三文魚咁好食。」
心太軟配
綠茶雪糕$38
除火鍋外，Toby大讚「樓上樓」甜品嘅做得出色：「心太軟係每次必食之選，外皮好似薯片咁脆，裏面嘅古力香滑暖笠笠，我唔食過唔安落㗎。」
搵食攻略
樓上樓海鮮火鍋（35800833）
地址︰尖沙嘴金巴利道45-47號金巴利廣場1字樓
營業時間︰星期一至日6:00pm-3:00am
座位︰120個，7:00pm-9:00pm最多客人，記得先訂位