因乜登兩張一模一樣嘅相呀？睇真啲吖唔該，有唔同㗎，今日就同大家玩Photo-Hunt，兩張相有10個不同之處，畀埋貼士你，右面幅相多咗10個金銀膶，10個金銀膶代表10碟超抵食日本菜。點抵法？明碼實價每碟$10，成枱大碟小碟1張紅衫魚搞掂，夠抵未？
記者：黃若茵 攝影：楊錦文
模特兒：Hibernia（Salvador）
大量入貨拉上補下
「浜」所有菜式碟碟$10，大廚話：「秋刀魚、翡翠螺同價格比較浮動嘅肉食點都要蝕少少，不過蝕唔入肉，因為老闆識得大量入貨。好似秋刀魚咁，每次起碼入200條，一日清貨，大量入貨價錢平番啲，有數為，拉上補下自然有得賺。」老闆搭嗲：「尖沙嘴人流高，多中高檔餐廳，但唔少人會專揀平價嘅嘢食，$10碟，喺尖嘴我估只此我一間。」係咪只此一間我唔敢講，不過餐廳選址亞士厘道，長方形地庫舖位，環境優雅，裝修老實就大路咗啲，但勝在枱與枱之間夠闊落，無話櫈背撞櫈背，坐得尚算舒服。
靚女提供售後服務
影相當日下午三點幾，全場冷清小貓三四隻，我問：「點解咁少人嘅？」劉經理話：「話晒商業區，殺完Lunch點都會靜一靜，到晚市又爆場㗎嘞，雖然啱啱開業，但我哋都儲到唔少熟客喇。」影完相閃，傍晚六點半折返做食客訪問，咦？無吹水喎，門口企滿人，起碼要等半個鐘先有位，門口仲企咗位靚女C.C.㖭。C.C.可以話係「浜」嘅親善大使，佢話：「老闆好睇重回頭客，專登請我番嚟負責售後服務，我要定期打電話同客人傾偈，問佢哋對餐廳有乜意見，當然唔少得Sell吓餐廳最新出品喇，唔少客都會返轉頭幫襯。」佢大方夠索，Keep熟客易如反掌，我唔係仔咋，如果係我一定攞佢手提電話啫。
10大最抵必食
1.鍋物：合鴨鍋
無錯牛肉鍋最啱香港人口味，但畀我揀就寧願要呢個合鴨鍋喇。諗真啲，所謂牛肉鍋都不過幾塊肥牛啫，鴨肉質唔差得過牛肉，難怪模特兒Hibernia都話：「呢個鍋最抵！雖然好多都係菜，但$10咁大鍋，無得彈呀。」
2.揚物：吉列生蠔
某壽司連鎖店一客吉列生蠔夠膽死收$50，今次$10咁平，點我都要叫番碟，外面炸得脆卜卜，入面充斥生蠔肉汁，唔錯喎。
3.爐端燒：鹽燒秋刀魚
𠵱家秋刀魚未至於最當造最肥美，不過算大條多肉，$10碟咪咁挑剔，食嗰陣記得淋檸檬汁，燒過嘅魚肉會更惹味香口。
4.刺身：翡翠螺
刺身之中我偏愛螺肉，因為肉質爽甜，亦唔似三文魚咁膩口。
5.卷物：軟殼蟹卷
一份兩件，軟殼蟹炸得香脆，有大量蟹子鋪面，份量多，我畀80分。
6.一品料理：紅酒薯仔煮牛尾
牛尾用紅酒醃過再燜兩粒鐘，紅酒味比較淡，好彩牛尾肉質好，加分。
7.壽司：煙鴨胸壽司
食壽司我寧願揀鴨胸，鴨胸肉好大件，入口OK滑，我建議咪點太多Wasabi，太多Wasabi盞冚晒肉味。
8.飯：鰻魚炒飯
鰻魚雖然切至細細粒，但每啖飯都有三四粒，想食得飽肚嗌個無衰。
9.拉麵：叉燒拉麵
豬骨湯底味道夠濃，叉燒味道就一般啲，算是不過不失，唯一缺點係份量太少，但有好味豬骨湯補數，我飲晒落肚一滴無嘥。
10.意粉：菠菜汁煙三文魚碎意粉
放心，絕對唔會用做刺身或壽司切剩嘅三文魚頭頭尾尾做呢道菜，抵。
食客有Say：個個都話抵！
搵食攻略
浜$10之專食店（23751232）
地址：尖沙嘴亞士厘道24-38號天星大廈地庫
營業時間：星期一至日11:30am-11:30pm
交通：尖沙嘴地鐵站A1出口
座位：150個，晚市必爆，記得訂位
人均消費：午市$50，晚市$100
最好賣：鍋物，日賣200多份