馮仁昭日前喺中環無無聊聊咁逛，哈，竟然俾我撞到一樣無無聊聊嘅前豐裕興業國際主席龐維仁嘅分居太太黃美儀，佢舊年因為李嘉欣介入而同老公感情觸礁，但自從李嘉欣改投許晉亨懷抱之後，佢兩公婆先至重修舊好拍拖擦生蠔。
日前黃美儀一身碎花裙孭住個LV袋行街街，心情靚靚咁由石板街一路行去間賣HelloKitty同大口仔精品嘅舖頭，仲買咗少少嘢。買完公仔後，黃美儀行出舖頭見到有人影佢相，鬼咁鎮定熟練咁企定任影。
淡忘傷心事
馮仁昭問黃美儀做乜咁耐唔見呀，佢笑笑口話：「忙返工吖嘛！」暑假唔出埠散吓心？佢話：「你都見我一個人啦！」問佢點睇早前大劉劉鑾雄豪擲20萬喺兩份報紙同李嘉欣賀壽？黃美儀keep住好好笑容咁話：「有睇，我咪以一個讀者身份去睇呢段新聞囉，如果你想問關於其他人嘅嘢，就無可奉告嘞。」
臨行前，黃美儀忽然好慨歎咁話：「之前發生咁多事，𠵱家好多嘢都唔同晒啦，等淡忘咗啲事後，我就會出番嚟㗎啦！」咁即係話shewillbeback！
