一位讀者Kent來電郵問及：「既然世界各地電訊股都跌，何以九四一（中移動）、九○六（中國網通）、七六二（中國聯通），如此堅挺？」
九○六、七六二未算係藍籌股，本欄喺七月十六日講嘅NTT、Nortel、SingTel、DeutscheTelekom、Vodafone、PCCW全部都係。九四一當然係藍籌股啦，一早已成為恒生指數成份股，呢隻股嘅波幅可以影響恒指走勢。翻查紀錄，呢隻股嘅歷史低價係八元九角（九八年十一月），歷史高價係七十九元（二○○○年三月，即係全世界電訊股都差唔多同時間到頂之時），千禧年科網股爆破之後，全球TMT股跌到一仆一碌，九四一亦難倖免，一路跌到○三年低潮的十七蚊左右，比最高價跌咗七成九，谷底反彈之後，○四年中展開升浪，從二十元一路升到最近嘅四十六元。
中移動可以反彈，但高價追入嘅投資者，仍未返家鄉，仍然蝕本四成二，但在眾多電訊股之中，已經算係好好咯；中國三隻電話電訊股好受益於中國嘅保護政策，以中國人口之多，地方之大，全國只有四家大型電信電話公司，家家賺錢。但香港彈丸之地，人口只有中國嘅0.5%，竟然有固網/流動電話公司九間之多，真係鼻屎好食，鼻孔挖穿，邊度再有增長前景吖。買電信股，首選當然係買中移動，假如投資者一早睇到呢一點，科網股爆破後，沽八號仔換馬買入九四一，到咗今日，蝕少好多。（左丁山八年來冇買賣過任何電訊股，目前手上冇電訊股股票）。投資最緊要識得止蝕，識得換馬，呢樣都唔識，只識得搵人出氣，最好離開股票市場，攬住銀行存款最安全──重要係港元或美元喎。
今天中國經濟增長速度好高，達雙位數字，香港啲公司冇法子唔北望神州，否則愈玩愈縮。只可惜中國好多公司啲管治令人不快，唔買中資公司股票，會蝕底，買咗就會驚佢甩底，奈何﹗