今屆世界盃神射手高路斯，決賽周有咁出色嘅表現，但點解轉會市場上一直都聽唔到有球隊對佢有興趣嘅新聞呢？不過好嘢自然唔使憂嘅，好似紐卡素最近就放風，諗住用750萬鎊買佢返嚟喎。原來紐記買入杜夫只係用500萬鎊，唔怪得知咁大想頭想要埋高路斯囉。
自知難吸引高路斯
噚日紐卡素正式邀得杜夫加盟，而轉會費只不過係500萬鎊，遠比日前傳媒所講嘅1,000萬鎊為少，都咪話唔奇。唔知係咪咁，有關紐卡素想買高路斯嘅風又愈吹愈盛。又係嘅，雖然成功買到杜夫，不過打慣翼鋒嘅佢間中推前客串吓前鋒就得啫，要佢代替受傷嘅奧雲真係講唔通，所以喺前線告急嘅情況之下，尋找新前鋒先至係領隊羅達𠵱家最重要嘅急務。
我求大俠仲係唔明究竟紐記係咪真係有咁多錢使？之前紐卡素引入奧雲、盧基使唔少唔在講，況且以賣出嘅保耶同埋祖柏嘅身價，最多咪收得番嗰100或幾10萬鎊，相比買人用嘅錢真係「小巫見大巫」。唔通紐記先至係英超之中最「禾稈冚珍珠」嘅球隊？可惜紐記連歐協盃都未知有冇得踢，試問點吸引到高路斯呢？不過，羅達都心知難引入高路斯，所以有兩手準備，諗住向韋斯咸開價收購艾殊頓，但聽講都要過千萬鎊先有得傾。
「睇到紐記咁積極擴軍當然係好事，不過我求大俠真係好懷疑佢哋錢從何來，既然都自知要高路斯紆尊降貴屈就冇乜可能，球會又有咁多錢使，倒不如向祖記或者費倫班球員埋手咪仲化算！」