地產代理監管局除鼓勵業界進修增值同加強巡查外，最近又加深咗考牌試嘅難度，逐步提高代理行業水平。該局又有辦課程同出書畀代理修讀，啲書仲會配合市場發展，加入最新嘅資訊。
最近出版嘅《地產代理業詞彙》修訂版，加咗更多新名詞，同時為個別詞彙加注簡體字，同普通話拼音，代理攞住本書去內地，一樣可以提供到貼身服務畀啲內地客。本書有好多同地產業務有關嘅常用語，又有對應嘅英文詞彙、簡體字寫法同普通話讀音等，簡直可以做自學教材。
地監局會免費寄一本書畀每一個持牌代理，認真周到，佢哋話之後攞到牌嘅都唔使擔心冇書攞，總之凡有牌嘅就有一本。若果想買都得，去地監局辦事處畀三十蚊就有一本嘞。截至上月底，全港有兩萬幾個持牌代理。