𠵱家做生意，要諗好多噱頭先至可以吸引到啲客嘅注意，好似忠誠拍賣咁，為咗催谷拍賣成績，除咗大賣廣告話有拍賣會，又送嘢畀到場人士同買家，兼搞埋大抽獎外，仲要爭取見報率，等多啲人知道。
噚日蘭西收到忠誠一份新聞稿，話下個月4號會搞一個「億元物業拍賣會」，聽落幾吸引，咁就登入忠誠網址，八吓內容係啲乜，原來當日會拍賣28件貨，單係計開價都已經值接近9000萬，若果有客爭吓，批貨就分分鐘過億。
咁有啲乜嘢單位呢？住宅最貴係大潭紅山半島4期5座5字樓B單位連2個車位，面積2143呎，開1380萬；同埋跑馬地學談花園24及25字樓B室連天台，2281呎，天台678呎，開價同樣1380萬。而非住宅最貴重嘅係屯門龍門居39號舖位，3069呎，開價1180萬。
咁又有冇平貨呢，答案係有嘅。最平嗰件係北角富澤花園地下82號車位，開價19萬。而住宅就有天水圍居屋天頌苑同安盛苑，開價都係48萬。
不過，蘭西最留意嘅反而係呢批貨原來全部都係銀主盤嚟嘅，若果都係同一家銀行，咁就幾傷嘞。
電郵地址：[email protected]