關你車事：四驅癡唔怕偷車賊　93萬流動屋去後藏

廿幾萬可以買一架全新日本車或二手歐洲豪房，但有人寧願花呢廿幾萬去改裝一架價值73萬嘅LX470四驅車，想唔想知價值廿幾萬嘅補品幾有睇頭?今次特別請咗呢位四驅癡車主同佢架改裝車一齊亮相，但礙於此車款依然高踞偷車榜行列，所以為安全起見，被訪者樣貌將會全程打格仔，以防萬一。

記者：黃婉冰
攝影：譚盈傑

20萬改裝90日遠征後藏

車主Leo之所以捨得豪花20多萬去幫架新LX470Set「行」裝備，除咗佢係個不折不扣嘅四驅車迷外，另一原因係佢參加咗一個前所未有嘅四驅之旅。「我今個月16號會同另外7架LX470組成四驅車隊，一齊由香港揸車去後藏，即西藏嘅後面，從來未有人試過好似我哋今次咁揸車上去，所以我諗會好刺激好好玩，但路線又長又辛苦（最高海拔6,000米），所以成個旅程前後要用成個半月時間，由四驅店老闆馬大立帶隊，佢為咗今次旅程，前後用咗2個月時間，日夜趕工幫我哋8部車做改裝，每架都有成30幾樣嘢要改，好似我呢架咁，要加霧燈、頭架、帳幕，又要升高架車、加AirLock、無線電對講機、天線、士啤胎、油缸由1個加到2個，後座座椅就全部拆走加裝咗2個櫃桶，可以用嚟放日常用品同汽車零件。除咗基本嘅日常用品之外，我特別訂咗個車用雪櫃、微波爐同壓力煲，個壓力煲都係特製，咁就可以去到邊煮到邊，淨係呢幾樣加埋都已經幾萬蚊，可能有啲人會覺得貴，但我鍾意玩四驅，我又會成日跟佢哋去四驅之旅，所以值得，而且𠵱家整好晒裝備，以後就算再去長途嘅四驅之旅都用得着，唔好話去中國，就算環遊全世界都得。」

$10,000急凍電櫃

高置引擎入氣

專用微波爐

增重1,000磅　要改避震懸掛

改裝後新車足足增磅1,000磅，要負重成幾千磅應付90日崎嶇路程，全車避震、懸掛都要改過。
「成架車所有裝備加埋重咗成千磅，原裝避震同懸掛根本唔適合，所以𠵱家改咗用一套適合普通路面又可以用嚟爬山嘅懸掛，就算平日出街行石屎路面都一樣得。同埋好彩今次馬大立搵到凌志中國代理（四川中達凌志汽車有限公司）Sponsor我哋所有零件，就算去到咁遠路程同咁長時間，都唔怕架車有咩病痛無零件。」

買LX470做專用戰車

長途跋涉去四驅之旅，Leo並非第一次，呢架LX470亦只係佢其中一架戰車。「我本身已經有幾架四驅車，之前由香港揸去北京，我就係用架福士TouaregV8，今次我特登買呢架LX470，一來係為咗今次呢個後藏之旅，二來我都想用佢嚟去以後其他比較崎嶇同難度較高嘅旅程。」