名模琦琦早前斥資近五萬元買了一套迪士尼美語世界給囡囡晴佳作學習及消閒，她表示物有所值，現年歲半的囡囡在playgroup已能與比她年長的兒童溝通，又能讀出各種動物的英文。琦琦否認自己對囡囡作填鴨式教育，只是希望囡囡自小便能多見識。
名模琦琦與任達華的女兒晴佳（Ella）現年一歲半，兩人視女兒如珠如寶，不惜花費大量金錢培育女兒，琦琦接受訪問時說：「我最希望Ella可以識多國語言，𠵱家佢一個禮拜要返六日playgroup、學兩堂法文。」
識讀名牌
琦琦續說：「之前老公個髮型師介紹咗一套迪士尼美語世界嘅學習消閒DVD畀我哋，話小朋友可以一邊娛樂睇卡通一邊學習，雖然要成四萬九千蚊，但我哋發覺效果好好，Ella𠵱家已經識晒A-Z26個英文字母，見我着啲名牌衫好似D&G，都識得指住講，同埋佢返playgroup同大個佢年幾兩年嘅小朋友都溝通得好好。」
問琦琦一下子要年僅歲半的囡囡學習這麼多，如填鴨式教育般，不怕囡囡消化不來嗎？她說：「唔會噃，我好認同三歲定八十呢句說話，就係等佢細個乜都唔識，就乜嘢都畀佢知畀佢見，好似好多人話唔好睇電視撈飯，我反而一邊播隻DVD畀佢睇，咁食飯就一定唔會扭計，臨瞓播啲卡通節目佢睇，佢又會快啲瞓着㖭。
想睇多啲
「上次帶囡囡去上海，我帶佢去動物園同水族館，佢見到熊貓同魚即刻識講panda同fish，我聽到真係好開心。其實我𠵱家咁早開始培育個女，唔係想佢第時一定要做乜嘢職業，只係想佢見多啲、睇多啲啫。」
採訪：DebbieLum
