香江呢邊，澤楷二少唔玩8號仔電盈；獅城嗰邊，另一位李家二少──李光耀資政位公子李顯揚，亦卸下新加坡電信總裁一職──世事真巧合，兩位二少個樣一啲都唔同，但行事同作風就好鬼似。
呢位獅城二少，曾經同香江二少拗手瓜爭奪香港電訊（假如佢當年贏咗，咁就冇電訊盈科，亦可能少好多人破產），佢上周六突然辭任新加坡電信嘅總裁職務，搞到成個獅城震晒，據講連新加坡電信內部都估佢唔到，呢間星洲最大嘅電信集團啲高層，聽到呢個消息，都儍咗咁唔知點反應。
背景雄厚作風平實
李顯揚後來開咗個臨時記者會，但冇交代離開嘅原因，只係話做咗12年同一個位，任期比多數總裁都長，離開都係時候喇……而去向亦未知，但唔會從政。咦，咁會唔會去搞下傳媒，買張報紙玩下呢？至於邊個坐佢個位，家陣都仲搵緊人，李顯揚答應暫時留任，等到董事局物色到接班人為止。
李顯揚48歲，係新加坡前總理、現任內閣資政李光耀個第二仔，佢阿哥係新加坡總理李顯龍，不過呢位二少冇乜少爺脾氣，佢94年4月加入新加坡電信，一年之後擔任集團總裁，贏得「新加坡商業奇才」稱號，作風平實。
佢掌管嘅新加坡電信，香港股民都唔會陌生。話說喺二千年時，大東想賣香港電訊，有意思買嘅就係新加坡電信。呢場隱含政治角力嘅交易，最後由澤楷二少控制嘅盈科數碼動力，以「蛇吞象」之勢，將香港電訊由新加坡電信嘅口唇邊搶番嚟。勢估唔到短短六年之後，澤楷二少意興闌珊，顯揚二少亦唔玩，電訊呢一行，真係咁得人驚？
讀者如有任何意見或報料，歡迎發送電郵[email protected]。