昨日大市好悶，唔夠200億銀成交，都唔知班經紀老友點算！經紀陳話，生意唔夠，好多行家本來自己都炒埋一份，但縮窄差價之後，炒即日鮮難度提高好多，生意淡薄佣金少，想維持生計都有問題。
另外，近日大手認購創富生物科技（340）的超大現代（682），昨日無端白事被多間大行沽貨，股價一度低見3.72元，收3.78元，大跌11％，成交股數高達2316萬股，金額9043萬元。
經紀黃話，超大現代咁跌法，唔使問阿貴都知道係有基金洗倉，但原因就眾說紛紜，其中最無厘頭就係話內地水浸，影響蔬菜收成。另外，早排亦有證券行調低對超大的評級。
小初就認為，金手指近數月密密減持超大，最影響投資者信心。金手指持股量由接近10％沽至剩下5％多少少。
超大早幾個月前，曾以每股5.60元配售舊股，可能有芬佬接咗貨，噚日見唔對路，於是斬倉沽貨，令股價跌得更重。
慕容小初