唔少賓卡都趁暑假外遊，但係滙豐銀行工商業務一姐梁高美懿唔止冇放假，仲忙到氣咳，前排幫邵銘高同鄭海泉揀「小跟班」，轉過頭又做「滙豐營商新動力獎勵計劃」嘅主席評判，挑選有社會責任嘅中小企。
自從滙豐公布要強攻工商業務之後，佢哋嘅吸客招數真係層出不窮，雖則今次只攞咗27萬出嚟做獎金，但就冧得呢班客好開心，印象分攞到足，咁有遠見放長線同中小企打好關係，抵過畀大嚿錢谷宣傳。
專揀大企業
講到有遠見，梁太細細個就已經好叻，佢好早之前，已經立志大學畢業後入大企業打工，所以中五開始，就年年做暑期工，仲專揀大企業做。佢話暑假唔返工，遊手好閒，淨係使錢；返工唔單止學到嘢，仲可以累積實戰經驗，畢業之後入大公司都易啲！
梁太話第一次出糧大部份畀屋企，剩低嘅就儲埋，冇特別買乜嘢，事關屋企有零用錢，用嘅嘢亦乜都有。喺大公司做暑期工，雖然通常都係做阿四，人哋叫做乜，佢就做乜，但可以睇到好多書本以外嘅事。雖則做過咁多份暑期工，但就從未涉足過銀行，家吓做咗賓卡，唔知覺唔覺得意外呢？