做乜跪我啫？入「和民」開餐，相信好多客人都有呢個疑問，咁跪喺度嘅侍應又點睇呢？Daisy話：「啱啱返工要我跪住落單都有少少唔慣㗎，不過公司規矩我要接受。其實呢啲只不過係日本文化，日本『和民』一向都係咁做，『和民』啲枱又設計得比較矮，企喺度落單好唔方便，我踎低身大家就可以平望，感覺親切好多。」
答得咁官腔嘅？講啲真心話得唔得？「試過有次幫一家人落單，個爸爸話要試吓踎低身嘅感覺係點，之後就真係踎喺地，嗰陣唔知點解我好感動呀。」放假，會唔會幫襯番「和民」？「會。」會唔會好想同事跪番自己轉頭？「又唔會咁諗，都話咗呢個只不過係日本文化咯，一旦接受咗就覺得好正常。」賣廣告時間到，畀啲版位你推介嘞，「近排經常同朋友食幾款夏日菜式，冷麵、芝士豆腐同埋新口味Pizza好正。吖，唔講住，我要去落單喇，再見。」
記者：黃若茵
刺身盛岡冷麵$38
大大碗，有甜蝦、帶子等刺身選擇，加泡菜同韓國辣醬，酸辣湯底放入幾粒冰，包你食到最後一啖都咁涼爽。
明太子芝士豆腐$28
細細件一口豆腐Size，咪一啖質入口，皆因面層布滿熱辣辣香軟芝士，好易辣親嘴仔。細細啖咬，香濃軟滑先最正。
鮭魚白味噌比薩$38
望落去件Pizza好薄，以為無乜料到，入口先知好足料，鮭魚肉厚唔在講，仲有咬到嘞嘞聲嘅蟹子，夠飽肚。
食客點睇
Dorothy：「成日嚟『和民』，知道跪低落單係配合日本文化，咁樣做無乜唔妥吖。」
嘉嘉：「香港人可能會抗拒，但去日本食嘢都係咁㗎啦，呢種文化唔難接受喎。」
和民居食屋（31562567）
地址：尖沙嘴新太陽廣場地庫B09號舖