着衫配上一條大珠鏈嘅熱潮，呢幾年都大行其道，條鏈襯得好，個人睇落的確醒目好多。襯衫講技巧，唔在行？唔緊要！花園街時裝店都有衫連鏈一套套出售嘅衫，方便一啲怕煩唔識襯嘅女士們購買，價錢方面，大部份都係$50有找，幾十蚊有衫着仲有鏈用，仲想點呀！
記者：許維雅
攝影：陳盛臣
Model：Gigi@Puremodels
Set01
「白色感覺好舒服！」
白色吊帶裙連白色珠鏈$65/c
評語：好靚！我自己本身特別鍾意白色，呢條裙同呢條鏈都好靚，雖然同樣係白色但感覺好Match，畀人好亁淨好舒服嘅感覺，整個Look好豐富。
可以點改善：完全冇問題！若然真係要加嘢，我會建議加多一條長嘅白色珠鏈，效果都應該不錯。
StylistKakA評：合格有餘
雖然幾十蚊就有衫又有鏈，但係如果襯得唔靚，真係送畀你都唔會要。今次搵嚟StylistKakA評一評呢類型一套套嘅衫鏈Set襯成點，有咩可以改善嘅地方。最後發覺大部份嘅結果都合格，效果尚算不錯，一個字講晒「抵」呀！
Set02
「紅襯黑，無問題！」
紅白色花紋背心連黑色喱士珠鏈$45/c
評語：一般，唔係太差！不過衫同珠鏈嘅款式都太花太多「DumDum」（碎喱士跌落嚟），件衫咁花，一啲都睇唔到鏈Details位。
可以點改善：紅色衫襯黑色鏈完全唔係問題，不過將兩條喱士剪咗去，令條鏈簡單啲會好啲。
Set03
「唔突出，但好Match!」
杏色背心加白色吊帶Top連啡色珠鏈$55/a
評語：OK！冇問題！幾好睇！條鏈嘅顏色同件白色衫好Match！
可以點改善：效果唔算好突出，但係顏色同條鏈嘅長度都啱啱好，冇嘢可以改善。
Set04
「彩間好青春！」
彩色橫間背心連彩色木珠鏈$49/b
評語：NotBad！成Set出嚟嘅感覺都冇問題，雖然兩者都彩色，但襯得都幾好睇，感覺好青春。
可以點改善：如果條鏈短番啲會好啲，長度去到心口位置左右，條鏈嘅顏色會仲出，最好多幾條中型Size嘅珠仔就Perfect喇！
其他精選抵買Set！
Set05
「民族鏈應該襯薄衫！」
藍色雪紡Top加米色背心連民族款珠鏈$59/d
評語：NoComment！其實基本上望落去係冇問題嘅，OKMatch嘅，但我按自己個人選擇就唔係咁鍾意呢啲款嘅鏈。
可以點改善：如果要戴民族款式嘅鏈，應該着啲愈薄身嘅衫愈好，好似有民族圖案嘅紗裙等。
Set06
「丟咗條珠鏈啦！」
白色雞翼袖Tee連金色珠鏈$49/d
評語：麻麻哋！算罷啦！件Tee個Pattern已經好多Details，戴條金色珠鏈只會浪費咗件衫。
可以點改善：可以丟咗條珠鏈佢，根本就唔需要再戴頸鏈，如果真係要戴，可以將條鏈改為手鏈仔都已經好足夠。
Set07
「可以襯白色鏈」
粉紅色一字肩Top連黑色喱士珠鏈$39/a
評語：麻麻哋！其實件衫幾靚㗎！條鏈就差啲，唔係好襯件衫！
可以點改善：其實粉紅色衫唔一定要戴啲黑色嘅珠鏈，可以改戴啲白色、粉黃色嘅珠鏈，效果都會好好。
Set08「多啲珠好睇啲！」
白藍幼間吊帶娃娃形背心連黑色珠鏈$49/c
評語：顏色同款式上配襯都OK！不過唔知係咪成本嘅問題，啲鏈大部份都係上幼下粗唔夠多珠，條鏈唔夠靚，好難戴得好睇。
可以點改善：長度怪咗啲！可以縮短啲條鏈同加多幾粒珠會好好多，心口見到多啲黑色珠會靚好多。
Set09「簡單咗啲！」
灰色tee連黑色半透明珠鏈$49/d
評語：冇問題，又或者可以話冇乜特別！OK啦！係簡單咗啲！
可以點改善：件衫好簡單，襯乜都好睇㗎喇！如果真係要改，條珠鏈啲珠密啲會好睇啲！
KakA：買多兩套撈亂襯
幾十蚊有衫有鏈已經十分抵買，就連KakA都話：「啲款式都唔差，幾十蚊套嚟講算好好！即使條鏈唔靚，唔要條鏈都抵呀！」如果醒目啲嘅話，仲可以將啲衫同鏈撈亂配襯，效果唔同咗，感覺又抵好多。KakA教路：「第3條鏈可以襯第1套衫、第1、4條鏈可以襯第2套衫、第1、2、5條鏈亦可以同時襯第4套衫。」呢類型衫鏈套裝，好多時仲有2件背心，想再抵啲嘅話，背心都可以互相配襯咁着，一樣出到唔同嘅效果。幾十蚊成本，分分鐘帶出3、4個不同效果，絕對係今夏BestBuy！
店舖查詢：
a/LS時裝（23940469）
旺角花園街151號
b/EG時裝（23989517）
旺角花園街137號
c/ME時裝（23081768）
旺角花園街150號
d/雄景時裝（沒裝電話）
旺角花園街與旺角道交界