港股上周四裂口大升後，高位承接仍好有力，上周五恒指曾下跌近100點，收市僅微跌8點，預期恒指在16400水平略作整固後，可向短期上升目標16800進發。
窩輪日日成交幾十億，香港威到盡，係全球最大窩輪市場，由於窩輪涉及嘅利益好大，大戶好多時候都要出手，左右大市同相關股份嘅表現，特別係在窩輪到期計價嘅一段時間，又或係大行要發窩輪時，呢種情況就特別明顯。
講咗咁多，只係想話畀大家知，由家陣開始，到8月下旬呢一段時間，係真空期，冇乜大藍籌嘅窩輪到期，大戶唔使好刻意去㩒價，咁會點做？最合情合理嘅，就係會谷個市上去，到高位時又再發過新一批窩輪，賺一大筆。所以，未來呢1個月，有理由相信大市會抽番轉，升幾多，睇大戶心意。
上半年內地汽車市場好旺，生產同銷售都突破350萬輛大關，分別係363萬輛同354萬輛，同比增長28.9%同26.7%。轎車銷量增幅更大，上半年賣出180萬輛，增46.9%。
銷售目標料可完成
駿威汽車（203）旗下的廣州本田銷量名列十大，今年6月銷售2.21萬輛，較5月的1.91萬輛增長15.65%，上半年共銷售12.35萬輛，預期全年可完成26萬輛的銷售目標。
駿威05年（12月年結）盈利19.05億元，跌7.6%，每股盈利25.4仙，期內增持廣州本田股權由47.5%至50%，但由於本田要減價爭取市場，應佔盈利反由20.77億元減到19億元。
06年，新車市場未有再掀起大規模嘅減價戰，加上虧損的裝嵌客車業務已出售，而目標產量又增加13%，估計盈利可回升到22億元，每股盈利0.30元。駿威上周五收2.55元，預測PE8.5倍，係大型汽車股中最抵買的。
美林看好內地汽車行業，盈利會有正面的增長，駿威係推介股份之一，預期係汽車市場持續增長的主要受益者，給予「買入」評級，目標價3.50元。瑞銀看法一樣，目標價3.45元。
駿威走勢有機會形成雙底，暫時受制於3條平均線（由2.56元至2.63元），一衝破3線阻力，確認中期調整完成，雙底形態的短期量度上升目標係3元。
郭兆誠