信德大老闆何鴻燊噚日帶埋寶貝女超雲，出席喺上水舉行嘅禁毒活動，同場仲有禁毒大使薛凱琪，華華見何超雲一襲白裙，一啲都唔輸蝕畀薛凱琪。
對於政府想徵銷售稅，呢位地產商同賭業大王話佢絕對唔贊成，「𠵱家增稅制未必好，驚啲人仆晒去深圳、珠海買嘢。」
咁官員話為咗做一個負責任嘅政府先至增設新稅，何鴻燊就話：「以商人嚟講，梗係希望交愈少稅愈好，香港咁成功都係因為咁，加新稅制會好影響香港嘅形象，少咗外商嚟香港，𠵱家呢度好安居樂業，跟番𠵱家稅制好啲。」咁佢咁有力，會唔會直接向特首講聲？「聽日我會見到佢，我都會畀意見佢。」
早排盛傳霍英東唔多妥，賭王就派定心丸：「佢好番好多，醫生話佢呢兩日可以落地行，大致上唔係好大問題。」