珠海市政府屬下的九洲發展（908）傳出資產重組及注資多時，但一直只見身郁唔見米白，股價亦一直在0.80元至0.90元之間浮沉，唔上唔落悶親人。不過，經紀陳就話即將有料到。
九洲發展上周五公布委任新行政總裁，原來的行政總裁雖然留任執行董事，但人已調升至大股東的九洲港務去，正所謂新人事新作風，相信好快就見到九洲發展有動作。
九洲發展上周五突然見異動，股價雖然只升3.41％，收0.91元，但成交股數就急增至1434萬股，金額1290萬元。
另外，一直話轉型做燃氣，兼夾早排以每股0.45元批股集資的駿新（091），上周突然有一日股價急插水15％。經紀陳話，江湖傳聞有人認為係大整蠱，正在偵查沽貨的幕後黑手。
駿新上周五回升2.5％，收0.41元，仍低過0.45元的批股價，要挽回投資者信心，睇嚟仲要畀心機。
慕容小初