上季一路保持住前列位置，誓保梗頸四嘅熱刺，到咗最後一場先至臨尾香，俾阿仙奴過咗頭失去歐冠盃嘅參賽資格，令人有啲失望。所以今夏再以高價搵嚟貝碧托夫，令到鋒力大增，而且喺季前嘅4場熱身賽贏到開晒巷，全勝之餘仲入咗7球，真係「龍咁威」！
日前熱刺同來季降班英冠嘅伯明翰打咗場友賽，係球隊近10日以來嘅第4場季前熱身賽，之前已經贏咗波爾多、尼斯同埋切爾達取得3連勝，氣勢如虹。講番呢場友賽，今夏以1,080萬鎊由利華古遜加盟嘅貝碧托夫，直情打到曉飛，盡顯身價，球隊最終以2:0擊敗伯明翰，都係拜佢所賜；因為佢喺開波之後嘅短短14分鐘內連入兩球，造就球隊友賽4連勝。
領隊滿意冇入錯貨
今次仲係貝碧托夫加盟熱刺之後，第1次真正同英格蘭球隊較量，見到佢有咁出色嘅表現，領隊祖爾都非常滿意咁話，睇佢之前喺法國打嘅3場友賽冇波入都有啲擔心，但見到佢呢場連入兩球，能夠咁快適應英格蘭嘅比賽節奏好開心，證明自己冇睇錯人。除此之外，今次祖爾更加「擺大頭」派晒羅比堅尼、廸科爾同貝碧托夫打3箭頭，而且效果仲好好㖭，睇嚟進攻足球將會成為熱刺來季嘅主要戰術。
「講真熱刺的確有本錢擺大個頭打進攻足球，不過都係要勸勸祖爾，熱身賽同正式比賽唔同，咪到開『咧』嘅時候，搞到頭重尾輕，否則只會得不償失！」