國泰「空中總管」莊偉茵，前一排返咗母校民生小學，做畢業禮嘅主禮嘉賓。佢話，一入到禮堂，就令佢諗番起好多美好往事，仲開心到即場自爆，畢咗業30年！
最愛詩意書籤
莊偉茵話，覺得家吓啲小朋友同佢細個嗰時，差別好大，佢仲笑笑口話自己嘅仔女，都秉承唔到佢勤力嘅美德。莊偉茵以非見習生出身，又係第一個女性晉身國泰董事管理層，做得嘢就大家都知，但原來佢細細個已經好勤力，好捱得，仲做過童工同工廠妹，真係講都冇人信！
佢話，6年班嗰年嘅暑假，已經喺個uncle嘅工廠做暑期工，剪線頭、包裝羊毛衫、幫公仔着衫、做假髮咁，乜都試過，通常啲工廠仲會包埋伙食，真係唔錯㗎！上到中學，識多咗嘢，就試過去老竇間寫字樓做打字文員，佢仲認真到走去學咗幾堂打字，一啲都無欺場！
賺到錢又點用呢？佢話，咪當做零用錢囉！通常都係用嚟買文具，尤其係嗰啲好詩情畫意嘅書籤，就係佢嘅心頭好。