港督彭定康又嚟到我哋特區玩，孫柏文見仲有番鬼佬遊客嚟特區都好開心。因為有番鬼佬遊客，我哋旅遊業就唔使咁依賴內地同胞來港消費，萬一祖國中央政府宏觀調控出手太大力，打垮咗經濟，令到自由行旅客人數減少，我哋旅遊業都仲可以有着落。
不過，我建議「千古罪人」彭定康先生下一次嚟到我哋特區玩，就要客氣啲，唔好有咁多嘢講。因為彭定康先生始終都係職業政治家，仲要係重量級嗰隻，佢一開口，三兩隻字就可以打低對手，所以嚟到我哋缺乏政治人才嘅特區講咁多嘢，會搞到好多土產業餘政客瞓低。
就算係咁都好，我都非常之仰慕唐英年司長。因為彭定康先生被問及關於銷售稅問題嘅時候，都只係講咗乜乜養肥政府、害死窮人之類就連孫柏文喺《金手指》都講過嘅說話，唐司長都已經第一時間反擊。唐司長明知自己唔係彭定康先生嗰皮，都「自殺式」咁挑釁，都算盡忠職守。
其實，唐司長嘅「反擊」都算高明，聽到唐司長話：「佢（彭定康）話過香港係一個好奇特嘅地方，又可以增加福利，又可以減稅，同時亦有盈餘，咁樣係違反經濟規律嘅。香港唔可以獨善其身，呢個係好明顯嘅。佢離開之後，拍拍籮柚走咗之後，跟住我哋就捱咗七年。我覺得經濟規律冇人可以違反，彭定康亦唔可以違反。」我讀過兩年經濟學，都覺得有道理。
不過高幾皮就係高幾皮，彭定康先生只係需要講句（粗略地繙譯）：「我得，因為我有曾蔭權做財政司。」如果呢句作為上聯，咁下聯就一定係：「Donald唔得，因為佢有邊個做財政司？」哈、哈！
陳佐洱曾經溫馨提示
不過孫柏文認真啲咁講，其實當年前宗主國總理戴卓爾夫人，都批評過彭定康為前宗主國保守黨「濕」派（Wet）嘅中堅分子，對自由市場、小政府理念嘅堅信程度，猶如濕水生菜般「堅挺」。所以我作為一個自由市場信徒，絕對同意陳佐洱先生，當年批評彭定康嘅說話。我記得前港督彭定康當年大力提高公共援助嘅時候，陳佐洱先生都已經「溫馨提示」過，我哋將會有嘅特區政府財政會因而「車毀人亡」，不過彭定康就「當佢冇到」咁繼續做。
我當年仲係一個中學生，記得來自前宗主國、令我成為自由市場信徒嘅老師曾經笑住咁講過：「估唔到去到二十世紀末，會有個共產黨官員，去鬧個保守黨政客嘅政策太過社會主義。」不過我都覺得怪，就算彭定康唔聽話，點解英明神武嘅董建華特首又冇推翻呢個劣政呢？咁董建華特首做唔到，點解曾蔭權特首都唔得？仲話要開徵銷售稅？唔通曾蔭權最能服務特區市民嘅方法，就係做番殖民地政府嘅財政司？唔怪之得封佢做啊Sir。
點都好，唐司長反擊嘅說話絕對錯唔晒，彭定康拍拍籮柚走咗之後，特區真係經歷咗七年浩劫，其中都真係因為彭定康曾經作出過嘅決定。如果用唐司長嘅思維，彭定康最敗筆之作，就一定係當年搵董建華做行政會議成員，讓董建華踏出做特首之路嘅第一步。
孫柏文