有人話電腦係本世紀最偉大發明，不過家住粉嶺嘅阿恩就話：「有咗電腦！公司嘢帶返屋企做，我話係最搵笨發明至真！」「我覺得微波爐先啱！以前煮飯，對住個火爐身水身汗，𠵱家有咗微波爐，簡單一叮！3幾分鐘，就話煮起一味！」佢話今日要同大家表演微波煮「4餸1湯」，而且仲係煎、焗、蒸、煲、紅燒樣樣得，問你服未！
記者︰劉昱蘭
攝影︰楊錦文
示範︰粉嶺讀者阿恩
香煎豆腐 豆腐熱辣勁香口
價錢︰$10/2人
需時︰7分鐘
前幾年阿恩係入廚初哥，用親鑊煮豆腐都例必爛晒！後來改用咗微波爐煮，唔使用鑊鏟兜，煮出嚟一定靚靚；而且在豆腐面再加少少油，叮完仲有香煎嘅「脆邊」效果，真係方便到痹！「不過唯一考大家者，是刀工問題！賣相靚唔靚，就睇你切得靚唔靚喇！」
材料︰
豆腐1磚、甘笋6片、荷蘭豆15條、鹽及糖各1/2茶匙、冬菇5朵、辣椒1條、醬油2茶匙、麻油1/4茶匙、粟粉1茶匙
豆腐$2/磚(a)
甘笋$3.4/100克(b)
荷蘭豆$8/斤(a)
簡易法
1.冬菇、辣椒、甘笋切片；豆腐切塊後撒鹽，加油用低火叮3分鐘；
2.把冬菇及辣椒拌勻，以高火叮2分鐘後淋上豆腐面，加入甘笋、荷蘭豆，把醬油、麻油、粟粉及糖拌勻倒入，再用高火叮2分鐘即可。
貼士
想再縮減煮食時間，食材可以再切細塊啲，愈細愈易熟。
葡國雞 咖喱忌廉湯變葡汁
價錢︰$18/2人
需時︰20分鐘
阿恩好鍾意食葡國餐，屋企附近就有間葡國餐廳，由食客食到變好朋友；有次餐廳冇晒佢至愛嘅葡國雞賣，大廚見佢「雞癮」難頂，於是教佢用咖喱粉溝忌廉湯就可成簡單的葡汁！佢就再轉個彎，用埋微波爐煮，叮一聲！20分鐘搞掂，勁快！
材料︰
雞髀2隻、薯仔2個、洋葱1/2個、咖喱汁3湯匙、忌廉雞湯1/2罐、鹽1/2茶匙、生粉1湯匙、牛油、胡椒粉適量
雞髀$7/磅(a)
薯仔$4.2./1.5磅(c)
忌廉雞湯$12.9/400克(c)
簡易法
1.雞洗淨，以鹽、油、生粉及胡椒粉醃好；
2.預熱2湯匙油2分鐘，倒入薯仔、洋葱及雞，加水以高火叮3分鐘；
3.拌勻咖喱汁及忌廉雞湯，高火叮3分鐘成稀糊，加所有材料，以烤焗Mode叮10分鐘即成。
貼士
把雞去皮可更入味、快熟又健康。
豬肉蟹箝 一支支啱開P
價錢︰$15/2人
需時︰15分鐘
阿恩最鍾意食炸蟹箝，不過用微波爐整唔出炸嘅效果；所以佢改以蟹箝釀豬肉，用微波蒸煮，入口勁滑，試過屋企開P，佢班朋友話一口一件，好味到唔停得嘴。
材料︰
蟹箝8個、免治豬肉200克、冬菇4塊、馬蹄5粒、麻油1/2茶匙、胡椒粉1/4茶匙、鹽1茶匙、生粉3茶匙、上湯1杯
免治豬肉$13.5/磅(c)
冬菇$64/斤(a)
馬蹄$4/包(a)
簡易法
1.冬菇馬蹄切碎溝入豬肉，加麻油、鹽、胡椒粉及生粉拌勻，平均包在蟹箝上，高火叮4分鐘；
2.把上湯、鹽、生粉及麻油拌勻，高火煮4分鐘後淋在蟹腿上即可。
貼士
想免治肉熟得平均，可先把肉用高火加熱，融化多餘油脂，1磅肉要加熱1分鐘，其間要攪2次。
中式紅燒銀鱈魚 魚滑味香濃
價錢︰$32/4人
需時︰10分鐘
材料︰
銀鱈魚2塊、冬菇2塊、火腿1片、上湯1/4杯、老抽生抽各1湯匙、酒1湯匙、油3湯匙、糖1茶匙
銀鱈魚$30/100克(b)
榨菜$6/斤(a)
上湯$7/375毫升(a)
簡易法
1.銀鱈魚浸滾水；冬菇及火腿切粒；銀鱈魚撈油，高火煮3分鐘；再加冬菇、火腿粒及油，高火煮1分鐘；
2.上湯、老抽、生抽、酒、油2湯匙及糖拌勻，用高火叮3分鐘，淋在魚上。
貼士
銀鱈魚切細啲會易熟啲，而且連「過滾水」工序都可以慳番。
雲耳排骨湯 清清淡淡
價錢︰$12/3人
需時︰20分鐘
材料︰
排骨600克、雲耳20克、百合30克、水4碗、酒及鹽各1茶匙
排骨$26/斤(a)
雲耳$10/3両(a)
百合$6/143克(a)
簡易法
1.排骨汆水；百合及雲耳浸好後，雲耳去蒂撕成小花。把所有材料先以高火叮5分鐘，再以中火叮10分鐘即可。
貼士
排骨以高火叮5分鐘，同樣可有去血水的「汆水」效果。
微波煮食秘技
1.生蛋、金屬器皿都唔放得入爐，大家都知道！其實鹽份高的食物，好似帶骨的煙肉都唔可以，雖然未至於爆炸，但叮完之後會好硬，唔好食就無謂啦！
2.搵嘢墊高碟餸，令佢唔好貼住爐底，亦可令微波同食物有更好接觸，令食物更快熟。
3.寧願唔熟，好過「過熟」，因唔熟可翻叮。
4.叮完攤一攤係必須步驟，就算熄咗爐，剩餘的熱力仲會繼續發揮煮食功用，愈厚實的食物，愈要長時間停放。
5.食物擺位有學問，因器皿外圍加熱快過中心，如果食物形狀不規則如西蘭花，將幼嫩部份放中央、粗硬莖部向外，會熟得平均啲。
6.有外皮或膜的食物如腸仔衣、焗薯等，要先刺穿食物，以防爆裂。
（a）沙田大圍街市
（b）沙田新城市廣場city'super
（c）沙田大圍道49-53號百佳超級市場
＊以上價錢以7月23日為準